Në Gjykatën e Prizrenit më është mbajtur seanca dëgjimore lidhur me kërkesën e Prokurorisë për caktimin e masës së arrestit shtëpiak ndaj të pandehurve Xhemajli Bislimaj dhe Besnik Ramadani, të dyshuar për veprën penale – përvetësimi në detyrë.
Pas dëgjimit të palëve, gjyqtarja e procedurës paraprake, Shpresa Emra, e aprovoi kërkesën e Prokurorisë dhe ndaj të pandehurve caktoi masën e arrestit shtëpiak në kohëzgjatje prej një muaji.
Sipas Prokurorisë, të pandehurit, në cilësinë e kryeinfermierit dhe infermierit në Qendrën Kryesore të Mjekësisë Familjare (QKMF) në Prizren, dyshohen se në bashkëkryerje kanë kryer veprën penale – përvetësimi në detyrë, duke përvetësuar para të arkëtuara gjatë ndërrimit të natës dhe duke mos i regjistruar e deklaruar në regjistrat përkatës të pagesave.
Prokurori tha se sipas hetimeve të deritanishme Xhemajli Bislimaj dyshohet se ka përvetësuar rreth 1,250 euro, ndërsa Besnik Ramadani rreth 1,032 euro, duke i shkaktuar dëm financiar QKMF-së në Prizren.
Ai theksoi se kërkesa për caktimin e masës së arrestit shtëpiak mbështetet në prova të shumta të siguruara gjatë hetimeve, përfshirë deklaratat e dëshmitarëve, deklaratat e të pandehurve, vendimet e komisioneve për shqyrtimin e ankesave, raportet e komisioneve disiplinore dhe prova të tjera.
Sipas Prokurorisë, ekziston rreziku që të pandehurit të ndikojnë te dëshmitarët dhe t’i shmangen procedurës penale, andaj kërkoi caktimin e arrestit shtëpiak për një muaj.
Nga ana tjetër, mbrojtësit e të pandehurve, avokati i të akzuarit Bislimaj, dhe avokati i të akuzuarit Ramadani, Hysen Gashi dhe avokatja Leonora Bytyqi Krasniqi, e kundërshtuan kërkesën e Prokurorisë, duke argumentuar se nuk ekzistojnë kushtet ligjore për caktimin e arrestit shtëpiak.
Ata theksuan se të dyshuarit kanë bashkëpunuar me organet e drejtësisë, të gjitha provat tashmë janë siguruar dhe ndaj tyre janë ndërmarrë edhe masa disiplinore, përfshirë transferimin nga vendi i punës, ndalimin e 50% të pagës bazë për gjashtë muaj dhe kthimin e mjeteve të dyshuara se ishin përvetësuar. Edhe të akuzuarit Bislimaj e Ramadani kanë mbështetur fjalët e avokatëve të tyre.
Pavarësisht kundërshtimeve të mbrojtjes, Gjykata e aprovoi kërkesën e Prokurorisë dhe ndaj Xhemajli Bislimajt dhe Besnik Ramadanit caktoi masën e arrestit shtëpiak në kohëzgjatje prej një muaji.