Kryeministri i Izraelit, Benjamin Netanyahu, ka deklaruar se do të marrë pjesë në Asamblenë e Përgjithshme të Kombeve të Bashkuara në Nju Jork, pavarësisht thirrjeve për zbatimin e një urdhër-arresti të lëshuar ndaj tij nga Gjykata Penale Ndërkombëtare.
Në një intervistë televizive, Netanyahu tha se nuk ka ndërmend të anulojë udhëtimin e planifikuar dhe bëri të ditur se rreth tij do të ketë masa të posaçme sigurie në rast të ndonjë tentative për arrestim gjatë vizitës jashtë Izraelit. “Kemi forca speciale rreth nesh”, deklaroi Netanyahu, duke shtuar se ka shërbyer më parë me këto njësi, pa dhënë detaje të tjera rreth rolit të tyre.
Deklaratat e tij erdhën pas reagimeve nga disa zyrtarë amerikanë, përfshirë kryetarin e Nju Jorkut, i cili kishte kërkuar respektimin e urdhrit të Gjykatës Penale Ndërkombëtare nëse Netanyahu do të vizitonte qytetin. Më pas, ai pranoi se autoritetet lokale nuk kanë kompetencë për një arrestim të tillë.
Presidenti amerikan Donald Trump ka deklaruar se Netanyahu nuk do të përballet me arrestim gjatë qëndrimit të tij në Shtetet e Bashkuara. Gjatë intervistës, kryeministri izraelit kritikoi ashpër kërkesat për arrestimin e tij, duke pretenduar se ato janë të motivuara politikisht, ndërsa hodhi poshtë akuzat e ngritura nga Gjykata Penale Ndërkombëtare.
Netanyahu foli gjithashtu për tensionet në Lindjen e Mesme, duke paralajmëruar se Izraeli do të reagojë fuqishëm ndaj çdo kërcënimi nga Irani dhe duke theksuar kundërshtimin e tij ndaj mundësisë që Teherani të zhvillojë armë bërthamore.
Ai përmendi edhe mundësinë e zgjerimit të marrëveshjeve diplomatike me shtetet arabe, duke përfshirë Arabinë Saudite, si pjesë e politikës së jashtme izraelite. Sinjali – aty ku e vërteta flet para lajmit!