Barcelona është vënë në qendër të një procedure disiplinore pas ankesës së paraqitur nga Atletico Madridi lidhur me interesimin e klubit katalanas për sulmuesin argjentinas Julian Alvarez. Sipas raportimeve, Barcelona ka marrë njoftim zyrtar nga Federata Spanjolle e Futbollit dhe FIFA, ndërsa tashmë duhet të paraqesë mbrojtjen e saj ndaj pretendimeve të klubit madrilen.
Atletico Madridi pretendon se drejtuesit e Barcelonës kanë zhvilluar kontakte të paautorizuara me Alvarezin, i cili është ende nën kontratë me klubin nga kryeqyteti spanjoll, me synimin për ta bindur që të kërkojë largimin.
Në rast se organet kompetente konstatojnë shkelje të rregullave që përcaktojnë negociatat me futbollistët nën kontratë, Barcelona mund të përballet me masa disiplinore ose sanksione. Megjithatë, drejtuesit e klubit katalanas raportohet se janë të qetë dhe mohojnë të kenë zhvilluar kontakte të paligjshme me lojtarin.
Ekipi ligjor i Barcelonës pritet ta dorëzojë deklaratën mbrojtëse brenda afatit të përcaktuar. Ankesa pritet t’i tensionojë edhe më shumë marrëdhëniet mes dy rivalëve, ndërsa mundësia e transferimit të Julian Alvarez në “Camp Nou” duket se është komplikuar ndjeshëm. Sinjali – aty ku e vërteta flet para lajmit!