Presioni po intensifikohet ndaj kancelarit gjerman, Friedrich Merz, pas riorganizimit të kabinetit që shkaktoi zemërim në radhët e tij dhe spikati në qendër të vëmendjes kompetencën e qeverisë së tij, ndërsa po lufton për shmangien e rritjes së ekstremit të djathtë në zgjedhjet shtetërore në shtator, ka raportuar të mërkurën () Reuters .
Deputetët e tij konservatorë do të votojnë të mërkurën për zgjedhjen e Thorsten Freit, të përzgjedhur nga Merzi, për shef të grupit të tyre parlamentar. Ndërsa normalisht ky do të ishte një formalitet, votim më i ngushtë sesa pritet mund ta kthejë vëmendjen te Merzi pas ditësh të përshkuara me grindje.
Pas vitit të parë të vështirë në detyrë, blloku CDU/CSU i Merzit po ngel prapa në sondazhe kundrejt Alternativës për Gjermaninë (AfD), parti e ekstremit të djathtë, dhe po përballet me perspektivën që AfD-ja të fitojë pushtet për herë të parë në nivel shtetëror në shtator.
Frei do të ketë rol kritik si një person kyç për koordinim me Socialdemokratët (SPD) e qendrës së majtë, aleatin e vogël në koalicionin qeverisës, për nxitjen e reformave që Merz i ka premtuar për ringjalljen e rritjes në ekonominë më të madhe të Europës.
Popullariteti personal i Merzit është në rënie, ka treguar sondazhi i grupit transmetues RTL/ntv të publikuar të martën, me vetëm 15% të të anketuarve të kënaqur me performancën e tij dhe vetëm 49% të mbështetësve të partisë të kënaqur me të.
AfD-ja gjithashtu për herë të parë i ka tejkaluar konservatorët në perceptimet e kompetencës dhe aftësisë për zgjidhjen e problemeve të Gjermanisë, ka treguar sondazhi. “Ngjarjet e javës së kaluar kanë dëmtuar ndjeshëm pozicionin e Merzit brenda CDU-së”, ka thënë një anëtar i bordit ekzekutiv federal të CDU-së për Reutersin.
Nga ana e tij, Merz ka parashikuar se stuhia do të kalojë deri në shtator, kur parlamenti të mblidhet përsëri dhe kur pritet të betohen ministrat e tij të rinj. “Unë supozoj se tensionet do të jenë ftohur disi deri në shtator”, ka thënë Merz.
Situata e tij është në kontrast me atë të paraardhëses konservatore dhe rivales së dikurshme politike, Angela Merkel, e cila kishte mbështetje më të madhe se partia në sondazhet e opinionit gjatë 16 viteve të saj si kancelare. Përgatiti: Rexhep Maloku – Kallxo.com