Tre persona janë ndaluar pas aksidentit tragjik në një vendpunishte në Prishtinë, ku një punëtor humbi jetën dhe një tjetër pësoi lëndime të rënda trupore. Ndaj tyre janë iniciuar hetime për veprat penale “Shkaktimi i rrezikut të përgjithshëm” dhe “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, raporton Sinjali.
Prokuroria Themelore në Prishtinë ka njoftuar se, me urdhër të Prokurorit të Shtetit, në vendin e ngjarjes janë angazhuar ekspertë të pavarur të sigurisë në punë dhe një ekspert i inxhinierisë mekanike. Gjatë veprimeve hetimore janë siguruar prova materiale, janë sekuestruar pamjet e kamerave të sigurisë dhe është kryer ekzaminimi i vendit të ngjarjes nga njësia e forenzikës.
Po ashtu, janë intervistuar dëshmitarët okularë dhe personi i lënduar, i cili po vazhdon trajtimin mjekësor në Qendrën Klinike Universitare të Kosovës (QKUK). Si pasojë e aksidentit, personi me inicialet E.Sh. ka humbur jetën, ndërsa një person tjetër ka pësuar lëndime të rënda trupore.
Prokuroria ka bërë të ditur se hetimet janë iniciuar për veprën penale “Shkaktimi i rrezikut të përgjithshëm”, nga neni 356, paragrafi 9 i Kodit Penal të Republikës së Kosovës, si dhe për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, nga neni 358, paragrafi 7 i KPRK-së.
Bazuar në dyshimet fillestare dhe provat e siguruara deri në këtë fazë, Prokuroria ka urdhëruar ndalimin e tre personave.
Sipas Prokurorisë, A.Sh. dyshohet për veprën penale “Shkaktimi i rrezikut të përgjithshëm”, ndërsa B.S., në cilësinë e personit përgjegjës të kompanisë ndërtuese, dhe E.E., si person i kompanisë investuese të projektit, dyshohen për veprën penale që lidhet me sigurinë në vendin e punës.
Prokuroria ka bërë të ditur se brenda afatit ligjor do të shqyrtojë kërkesën për caktimin e masave të sigurisë ndaj personave të dyshuar, ndërsa do të vazhdojë me të gjitha veprimet e nevojshme hetimore për zbardhjen e plotë të rrethanave të aksidentit.
Ky është i riu që humbi jetën në vendin e punës në Prishtinë E rëndë: Humb jetën një 20-vjeçar pas rënies së vinçit në Prishtinë Sinjali – aty ku e vërteta flet para lajmit!