Prishtina kishte marrë një pikë të madhe (7 dhjetor, 1986) në Osijek në kuadër të javës së 16-të të Ligës së Parë të ish Jugosllavisë në futboll. Prishtina barazoi me rezultat 1:1 me Osijekun, ndërsa ndeshjen e karakterizoi edhe një provokim i Shmudllës ndaj Sahit Kelmendit në minutën e 75-të. Duhet theksuar se Davor Shuker goditi shtyllën pingule të Prishtinës në minutën e 70-të.
Osijeku renditej në vend të 4-të me 16 pikë dhe Prishtina në të 17-tin me 9 sosh. “Takimi ndërmjet Osjekut vendës dhe Prishtinës u zhvillua në kushte tejet të vështira. Moti ishte i ftohtë, fusha e ngrirë dhe tejet e papërshtatshme për të zhvilluar një lojë normale e cilësore.
Të dy skuadrat u përpoqën deri në maksimum dhe bënë një lojë më shumë atraktive për nga lufta e madhe për zotërimin e topit dhe organizimin e çdo aksioni, lojë çfarë mund të zhvillohet në këto kushte.
Kuptohet se ajo nuk mundi të ketë ndonjë bukuri të madhe por, meqë e përshkoi vetëmohimi i pashoq, sidomos i futbollistëve të Prishtinës, ndeshja midis këtyre dy skuadrave, megjithatë, e arsyetoi veten dhe afro 3.000 shikues u ndanë të kënaqur me atë që treguan futbollistët e të dy skuadrave”, kishte shkruar gazetari Veli Vraniqi me 8 dhjetor të vitit 1986 për sportin e “Rilindjes”.
“Të themi se loja ishte mjaft e ashpër dhe se 15 minutat e fundit Prishtina luajti me një lojtar më pak ngase referi Jokiq nga Beogradi e ndëshkoi Kelmendin me karton të kuq kur ky e goditi një futbollist kundërshtar, atëherë kur ai nuk e kishte topin dhe pasi kishte akorduar referi goditje të dënimit në favor të Prishtinës.
Referi Jokiq i ndëshkoi edhe tre futbollistë të Osjekut me kartona të verdhë për lojën e tyre të ashpër”, shkruan më tej.
Sahit Kelmendi theu këmbën Prishtina fitoi një pikë shumë të vlefshme në Osjek, por atë e pagoi shumë shtrenjtë, ngase në këtë ndeshje theu këmbën njëri nga futbollistët më të mirë, Sahit Kelmendi, i cili, pasi nga dhimbjet e mëdha reagoi, por në mënyrë jo sportive, referi Jokiq i Beogradit me të drejtë e përjashtoi.
Ndaj Kelmendit startoi shumë ashpër Shmudlla dhe, siç na njoftoi masazhisti i Prishtinës, Nexhmedin Statovci, lëndimi është mjaft i rëndë. “Sahitit iu thye këmba e majtë në të ashtuquajturën fibulë. Pasi u konstatua thyerja, menjëherë këmba iu vu në gips, të cilin ky futbollist patjetër duhet ta mbajë së paku 21 ditë”, na tha Nexhmedin Statovci.
Osijeku – Prishtina 1:1 Ndeshja u zhvillua në stadiumin e qytetit në Osijek. Moti i ftohtë. Fusha shumë e papërshtatshme për lojë. Shikues – afro 3.000. Golat i shënuan: Rakella në minutën 32 për Osjekun, ndërsa Stoimir Urosheviqi (pas asistimit të Fadil Muriqit) në minutën 8 për Prishtinën. Referoi Zvonko Jokiqi i Beogradit, të cilit i ndihmuan Beusan i Dubrovnikut dhe Zekan i Splitit.
Me karton të kuq u ndëshkua Kelmendi i Prishtinës, ndërsa me të verdhë Shmudlla, Orshulliqi dhe Lepinjica të Osjekut. Osjeku: Biliqi 6, Shmudlla 6, Kostiqi 6, Kasallo 7, Zheravica 6, Orshulliqi 6 – Jerkoviqi 6, Llukiqi 6, Shuker 6, Rakella 7 dhe Allar 6 (Lepinjica 6).
Prishtina: Darko Bjellojeviq 7, Arbnor Morina 7, Faton Domi 7, Gani Llapashtica 7, Skënder Shengyli 7, Muhamed Kolenoviq 8, Mensur Nexhipi 6 (Goran Pupavac), Sahit Kelmendi 6, Boban Stankoviq 6, Fadil Muriqi 7 dhe Stoimir Urosheviq 6 (Fadil Berisha).