Pas zhgënjimit në garën e Silverstone erdhi gëzimi në pistën e SPA për pilotin Kimi Antonelli. Italiani fitoi në Belgjikë pas një dueli emocionues me Ferrari dhe Leclerc, por mbi të gjitha, ai rifitoi terren në renditje. “Ishte fantastike të kthehesha në podium pas disa garash të vështira.
Ishte një garë e luftuar fort, humba kryesimin për shkak të makinës së sigurisë dhe ishte një betejë e vështirë me Leclerc sepse ai po ecte fort”, tha Antonelli. “Ishte një fitore e madhe, është mirë të marr kaq shumë mbështetje dhe është një privilegj të jem në gjendje të përfaqësoj Italinë. Po përpiqem të bëj më të mirën time dhe ta kthej flamurin italian në shkallën e parë”, shtoi ai.
Më tej, ai tha: “Duhet të shfrytëzoj çdo mundësi, duhet të vazhdojmë të ecim përpara me performancën tonë dhe do të shohim se çfarë ndodh në fund të vitit“, tha piloti i Mercedes, që përgatitet për garën e radhës. “Tani duhet të përqendrohemi te gara në Budapest, ku Ferrari me siguri do të jetë shumë i fortë.
Këtë javë sollëm një paketë pak më të lehtë, në Hungari do të kthehemi në konfigurimin nga garat e mëparshme”, tha Antonelli. “Por, nuk do të jetë e lehtë, sepse Ferrari është shumë i forte. Do të jetë e rëndësishme të përpiqemi të maksimizojmë çdo seancë të vetme dhe të sjellim në shtëpi rezultatin më të mirë të mundshëm”, deklaroi italiani.