Para finales së Kupës së Botës 2026 ndaj Argjentinës, vëmendja është përqendruar te ylli i ri Lamine Yamal, por dy lojtarë të tjerë kanë qenë vendimtarë në suksesin e Spanjës gjatë këtij turneu: Rodri dhe Dani Olmo. Ata janë bërë shtyllat kryesore të skuadrës së Luis de la Fuente – Rodri si organizatori i lojës nga mesfusha dhe Olmo si krijuesi kryesor në repartin ofensiv.
Rodri, lideri dhe ekuilibri i Spanjës Rodri, fitues i “Topit të Artë” në vitin 2024 pas paraqitjeve të jashtëzakonshme me Manchester Cityn dhe kombëtaren spanjolle, ka kaluar një periudhë të vështirë pas një lëndimi të rëndë në gju, por në Botërorin 2026 është rikthyer në nivelin e tij më të lartë. Kapiteni i Spanjës ka qenë një nga lojtarët më të rëndësishëm të ekipit.
Në këtë Botëror ai ka kompletuar 648 nga 694 pasime të tentuar, me një saktësi prej 93 për qind, duke qenë lojtari me shpërndarjen më të mirë të topit në turne. Nga këto pasime, 173 kanë përfunduar në pjesën e fundit të fushës, duke treguar se Rodri nuk është vetëm një lojtar që kontrollon ritmin e lojës, por edhe një futbollist që ndihmon në krijimin e rasteve.
Ai ka krijuar gjithashtu nëntë raste për gol nga loja e hapur. “Rodri është shtylla jonë kurrizore”, ka thënë për të përzgjedhësi i Spanjës, Luis de la Fuente. Përveç organizimit të lojës, mesfushori i Manchester Cityt ka shkëlqyer edhe në aspektin defensiv. Pozicionimi i tij, ndërhyrjet dhe aftësia për të fituar topa kanë qenë vendimtare, veçanërisht në gjysmëfinalen ndaj Francës.
Dani Olmo, krijuesi i madh i sulmit Nëse Rodri është truri i Spanjës në mesfushë, Dani Olmo është lojtari që i jep kreativitet fazës sulmuese. Futbollisti i Barcelonës, i cili më herët ka punuar me De la Fuente te kombëtarja U21, ka qenë vendimtar në ndërtimin e aksioneve dhe në krijimin e rasteve për bashkëlojtarët.
Në gjysmëfinalen ndaj Francës, Olmo kompletoi 97 për qind të pasimeve dhe asistoi në golin e dytë të Pedro Porros, pas një kombinimi të shkëlqyer. Ajo që e dallon Olmon është inteligjenca e tij në lojë. Ai shpesh mendon një hap para kundërshtarëve dhe me lëvizjet e tij përcakton ritmin e sulmit spanjoll.
Ish-futbollisti i Spanjës dhe kampioni i botës, Cesc Fàbregas, e ka vlerësuar lart paraqitjen e tij. “Ai është lojtari më i mirë i Spanjës. Nuk bëhet fjalë vetëm për gola apo asistime, por për inteligjencën e tij. Lojtarë si ai nuk luajnë vetëm futboll, ata zgjidhin probleme”, ka thënë Fàbregas.
Olmo nuk e nisi Botërorin si titullar, pasi qëndroi në bankinë në barazimin 0:0 ndaj Kepit të Gjelbër, por që nga ndeshja ndaj Austrisë në fazën e 1/16-tës ka qenë pjesë e formacionit bazë në çdo takim.
Me Rodrin dhe Olmon në zemër të skuadrës, Spanja ka ndërtuar një ekip që kombinon kontrollin, kreativitetin dhe stabilitetin, elemente këto që e kanë sjellë deri në finalen e madhe të Kupës së Botës ndaj Argjentinës.