Finalja e Kupës së Botës mes Spanjës dhe Argjentinës nuk do të jetë vetëm një ngjarje sportive, por edhe një spektakël i madh argëtues, me pjesëmarrjen e disa prej emrave më të njohur të muzikës dhe kinemasë botërore.
Në stadiumin “MetLife” në New Jersey, ku priten rreth 80 mijë tifozë dhe miliarda shikues në mbarë botën, ceremonia përmbyllëse para ndeshjes dhe spektakli i pushimit do të mbledhin një numër të madh yjesh ndërkombëtarë.
Në ceremoninë para finales pritet të performojnë aktori i njohur Tom Cruise, këngëtari britanik Robbie Williams, Nicole Scherzinger dhe fituesja e çmimit Oscar, Jennifer Hudson, e cila do të interpretojë himnin kombëtar të Shteteve të Bashkuara.
Në stadium do të jenë gjithashtu reperi Post Malone dhe ylli i platformave sociale IShowSpeed, ndërsa i pranishëm do të jetë edhe presidenti i SHBA-së, Donald Trump. Megjithatë, kulmi i spektaklit pritet të jetë shfaqja 11-minutëshe në pushimin mes pjesëve, e para e këtij lloji në historinë e Kupës së Botës.
Në skenë do të ngjiten Madonna, Justin Bieber, grupi korean BTS dhe Shakira, kënga zyrtare e së cilës për turneun, “Dai Dai”, në bashkëpunim me Burna Boy, ka shoqëruar Botërorin gjatë gjithë kompeticionit.
Programi artistik do të përfshijë edhe dirigjentin venezuelian Gustavo Dudamel, një kor nga New Yorku dhe grupin Coldplay, me vokalistin Chris Martin që ka kuruar të gjithë konceptin e spektaklit. Sipas FIFA-s, kjo pritet të jetë shfaqja më e madhe e organizuar ndonjëherë në një finale të Kupës së Botës.
Spektakli do të ketë edhe një qëllim bamirësie, pasi do të shërbejë për mbledhjen e fondeve për një nismë globale në fushën e arsimit, e udhëhequr nga FIFA në bashkëpunim me organizatën Global Citizen. Për shkak të organizimit të skenës, pushimi i finales mund të zgjasë më shumë se 15 minutat e zakonshme.
Një situatë e ngjashme ndodhi edhe në finalen e Kupës së Botës për Klube të vitit të kaluar, e zhvilluar po në stadiumin “MetLife”, ku pushimi zgjati mbi 24 minuta.