Ujëvarat e Mirushës përfaqësojnë një nga monumentet më të jashtëzakonshme natyrore të Kosovës, duke ofruar një ndërthurje unike të hidrografisë, gjeomorfologjisë dhe biodiversitetit. Ky peizazh i mbrojtur mbetet një destinacion i përsosur për turizëm.
Pavarësisht se rritet nevoja për investime në infrastrukturë, Mirusha mbetet një mozaik natyror prej 16 liqenesh të ndërlidhura me 12 ujëvara të njëpasnjëshme që tërheq vizitor vendas dhe të huaj. Kanioni i lumit Mirusha është ndër mrekullitë më të bukura natyrore të Kosovës, një pikë referuese për turizmin vendas.
Ky vend unik dallohet për 16 liqenet e tij të ndërlidhura me 12 ujëvara, të rrethuara nga gurë të thepisur gëlqerorë, shpella mistike dhe një biodiversitet jashtëzakonisht të pasur. Atraksioni tërheq çdo ditë e më shumë vizitorë vendorë dhe ndërkombëtarë. “Është hera e parë që jam në Kosovë.
Është një vend shumë i bukur, shumë atraktiv në të cilin gjendeshin pellgjet natyrore, shumë të bukura dhe me një diversitet të pasur natyror. Meqë jam për herë të parë në Kosovë kam krijuar përshtypje të jashtëzakonshme me bukuritë natyrore të kësaj zone në veçanti e cila e bën vendin tuaj atraktiv për vizitorë. Ndërsa jam i impresionuar me biodiversitetin siç di vetëm natyra ta krijon.
Përshtypjet e mia janë të jashtëzakonshme dhe sigurisht që do ta rikthehem prapë në këtë vend”, tha Gjovani Rimpa, turist nga Italia. I shpallur si Park Regjional Natyror, ndërhyrjet e njeriut këtu janë të vogla dhe fokusohen vetëm tek siguria. Larg zhurmës urbane dhe temperaturave të larta të verës, këtu dëgjohet vetëm gurgullima e ujit dhe gjinkallat.
Vizitorët shfrytëzojnë rastin për fotografi, shëtitje me barkë nëpër pellgje apo për t’u freskuar në liqene. “I vetmi në Kosovë. Është zona më e mirë, vend ma të mirë nuk ka. Këtu vijnë prej vendeve të huaja. Ky është letërnjoftim i yni. Është vend i mbrojtur. Leje ndërtimi këtu nuk ka, nuk lejojnë. Unë jam nga këtu dhe vij çdo ditë.
Më së shumti vizitorë ka të shtuneve e të dieleve”, tha Halil Hasanaj – banor i zonës. Interesimi për Ujëvarat e Mirushës po rritet dita-ditës. Me pak më shumë investime në infrastrukturën rrugore dhe në sigurinë e shtigjeve, ky kanion do të shndërrohet në një pikë kyçe të turizmit në Ballkan.
Deri atëherë, vlerat ekologjike dhe peizazhet e virgjra do të mbeten të dokumentuara në kujtimet, fotografitë dhe videot e panumërta të çdo vizitori.