Argjentina e mposhti Anglinë me rezultat 2:1 në gjysmëfinalen e Kupës së Botës dhe në finale do të luajë kundër Spanjës. Edhe pse Anglia ishte në avantazh gjatë pjesës më të madhe të pjesës së dytë, argjentinasit me një përmbysje në fund të ndeshjes siguruan kualifikimin në finale.
Anglinë në epërsi e solli Gordon në minutën e 55-të, por fitoren dhe biletën për në finale Argjentinës ia siguruan Enzo Fernandez me golin në minutën e 85-të dhe Lautaro Martinez në kohën shtesë. Pas ndeshjes, taktikat e kombëtares angleze u kritikuan ashpër nga Wayne Rooney, i cili theksoi tërheqjen e pakuptueshme të skuadrës pas golit të shënuar.
“E kishim vënë veten në një pozitë shumë të mirë, dhe më pas nuk e kishim idenë se çfarë duhej të bënim. U tërhoqëm dhe i lejuam ata të na shtypnin. Krijuan shumë raste dhe në fund u thyem. Jam vërtet i zhgënjyer”, tha Rooney për BBC dhe vazhdoi: “Pas golit të parë, nuk u përpoqëm të shënonim edhe të dytin.
Sa u përket lojtarëve, por edhe mua, Thomas Tuchel mori një vendim, dhe kur merr një vendim të tillë, atëherë rrezikon. Ai vendosi të luante me pesë mbrojtës, gjë që u mundësoi atyre të diktonin lojën. Vendimet e Tuchelit sonte na kushtuan. Këta tifozë kanë shpenzuar shumë para për të ardhur këtu. Prisja më shumë nga kjo ndeshje. Argjentina është kampione e botës.
E dinim se kjo do të ishte diferenca vendimtare. Ndryshimet që bëmë nuk na ndihmuan. Jam plotësisht i shkatërruar. Ndonjëherë për të fituar turne të tilla të duhet edhe pak fat”.