Atletico Madrid ka bërë zyrtare interesimin për sulmuesin e Juventusit, Jonathan David, duke paraqitur ofertën e parë zyrtare për reprezentuesin kanadez. Atletico Madrid është shfaqur si klubi kryesor i interesuar për Davidin, teksa afati kalimtar veror po hyn në 48 orët e fundit.
Gjigantët spanjollë i kanë dorëzuar Juventusit një propozim për sulmuesin kanadez, i cili iu bashkua klubit nga Torino verën e kaluar me pritshmëri të mëdha, por nuk ka arritur të gjejë ritëm të qëndrueshëm nën drejtimin e Luciano Spallettit. Sipas ekspertit të transferimeve, Fabrizio Romano, oferta e Atletico Madridit është për një huazim fillestar me opsion blerjeje.
Aktualisht, negociatat po vazhdojnë për detajet financiare të marrëveshjes së përhershme. Transferimi vjen në një moment të trazuar për repartin ofensiv të Atletico Madridit. Julian Alvarez është lidhur fuqishëm me një transferim të bujshëm te Barcelona në ditët e fundit të merkatos dhe Diego Simeone ka nevojë urgjente për përforcime për të ruajtur konkurrueshmërinë e skuadrës.
Juventusi është i hapur për largimin e Davidit, por nuk dëshiron të mbetet pa alternativë në repartin ofensiv. Drejtuesit e klubit, të udhëhequr nga drejtori sportiv Frederic Massara, e kanë bërë të qartë se do t’i japin dritën jeshile transferimit vetëm pasi të identifikohet dhe sigurohet një zëvendësues i përshtatshëm.
“Zonja e Vjetër” është nën presion për ta zgjidhur shpejt situatën, pasi David është një nga lojtarët me pagën më të lartë në skuadër. Largimi i tij do t’i lironte klubit një pjesë të konsiderueshme të faturës së pagave dhe do t’i krijonte më shumë hapësirë financiare për investime të tjera. Situata komplikohet edhe më shumë nga roli i Davidit në skemën taktike të Spallettit.
Edhe pse u transferua si lojtar i lirë nën drejtimin e një strukture të udhëhequr nga Damien Comolli, kanadezi nuk është përshtatur siç duhet me sistemin aktual të lojës. Në pritje të largimit të Davidit, Juventusi tashmë e ka ngushtuar listën e kandidatëve për një sulmues me profil më fizik.
Sulmuesi i Crystal Palace, Jean-Philippe Mateta, është shfaqur si kandidati kryesor për t’iu bashkuar klubit italian, ndërsa raportimet bëjnë me dije se largimi i Jonathan Davidit është kusht thelbësor për të hapur rrugën e këtij transferimi.
Interesimi për Matetan tregon edhe një ndryshim në strategjinë e rekrutimit të Juventusit, që po largohet nga profilet e sulmuesve të dytë dhe lojtarëve më mobilë, për t’iu drejtuar një profili më tradicional të “numrit 9”.
Juventusi kishte shqyrtuar më herët edhe opsione të tjera, përfshirë Joshua Zirkzeen dhe disa talente të Premier League, por disponueshmëria e Matetas dhe dëshira e francezit për t’u transferuar në Torino e kanë vendosur atë në krye të listës së dëshirave.
Tani mbetet të shihet nëse Atletico Madrid dhe Juventusi do të arrijnë marrëveshje për Jonathan Davidin përpara mbylljes së afatit kalimtar.