Kylian Mbappe vazhdon të jetë një nga emrat më të përfolur të Kupës së Botës, ndërsa për ish-futbollistin Ledio Pano, ylli francez ka karakteristika që e afrojnë me një nga legjendat e futbollit europian, Karl-Heinz Rummenigge. Pano bëri një krahasim interesant mes sulmuesit të Francës dhe ish-fituesit të “Topit të Artë”, duke theksuar ngjashmëritë në stilin e lojës.
“Nuk po flasim për Fenomenin Ronaldo, sepse ai ishte unik dhe jo më kot mori nofkën ‘Fenomeni’. Por nëse e shohim Mbappen si profil lojtari, deri diku më ngjan me Rummeniggen. Ka potencialin, shpejtësinë, forcën, dinamizmin dhe dëshirën për të goditur portën”, u shpreh Pano. Sipas tij, këto cilësi e bëjnë Mbappen kandidatin kryesor për të fituar “Këpucën e Artë” të turneut.
“Kur më pyetën se kush do të jetë golashënuesi i Botërorit, unë thashë Mbappe. Ai i ka të gjitha cilësitë dhe ka gjithashtu një skuadër shumë të fortë që e mbështe t”, deklaroi ish-sulmuesi. Pano vlerësoi gjithashtu potencialin e Francës, të cilën e konsideron një nga ekipet më të frikshme të këtij Botërori. “Franca është e frikshme me cilësinë që ka në përbërje.
Mund të ketë disa luhatje në repartin defensiv, por mesfusha dhe sidomos sulmi janë në një nivel shumë të lartë. Forca e saj ofensive është e jashtëzakonshme”, analizoi ai.