Me rastin e 25 qershorit, Ditës Kombëtare të Republikës së Sllovenisë, organizohet aktiviteti kulturor “Netët e Filmit Slloven”, i cili këtë vit shënon edhe 35-vjetorin e pavarësisë së Sllovenisë.
Gjatë dy mbrëmjeve, publiku do të ketë mundësinë të ndjekë filma bashkëkohorë sllovenë, të cilët sjellin rrëfime të veçanta artistike, realizime të regjisorëve të njohur dhe bashkëprodhime me dimension ndërkombëtar. Programi synon të promovojë kulturën dhe kinematografinë sllovene, si dhe të forcojë shkëmbimin kulturor ndërmjet vendeve evropiane.
“Netët e Filmit Slloven” organizohen me mbështetjen e Bashkimit Evropian në Kosovë dhe Kino Armata. Filmat e përfshirë në program janë përzgjedhur nga Konsorciumi Evropian për Festivalet e Filmit Evropian, një iniciativë e mbështetur nga Bashkimi Evropian dhe e menaxhuar nga Cineuropa.
Organizatorët ftojnë të gjithë dashamirët e filmit dhe kulturës evropiane që të marrin pjesë në këtë ngjarje, e cila ofron një mundësi për t’u njohur më afër me krijimtarinë bashkëkohore filmike të Sllovenisë dhe për të festuar një datë të rëndësishme në historinë e saj shtetërore.
Aktiviteti pritet të mbledhë adhurues të filmit, artistë dhe përfaqësues të institucioneve kulturore, duke krijuar një hapësirë për dialog kulturor dhe promovim të vlerave evropiane përmes artit kinematografik.