Ish-ministrja e Partisë Socialiste, Ermelinda Meksi, i është bashkuar thirrjes së socialistit Ilir Zela për një reflektim të thellë mbi funksionimin e brendshëm të Partisë Socialiste, duke theksuar se demokratizimi i saj nuk duhet të mbetet një slogan, por të shndërrohet në një proces real politik dhe statutor.
Në një reagim publik, Meksi nënvizon se sfida kryesore për çdo organizatë politike është ruajtja e aftësisë për t’u vetëkorrigjuar. Sipas saj, një parti që nuk reflekton mbi veten, nuk pranon kritikën dhe nuk rinovon mekanizmat e saj të brendshëm, rrezikon të humbasë lidhjen me anëtarësinë dhe me shoqërinë.
Ajo propozon rikthimin e zgjedhjeve dhe rifreskimit të strukturave të Partisë Socialiste çdo katër vjet, si një mënyrë për të garantuar përfaqësim, ekuilibër dhe legjitimitet të brendshëm.
Meksi shprehet se Asambleja Kombëtare duhet të jetë produkt i vullnetit të delegatëve të Kongresit dhe jo të ndërtohet mbi anëtarësime ex officio, të cilat, sipas saj, zbehin peshën e zgjedhjes demokratike.
Ajo argumenton se deputetët dhe kryetarët e bashkive kanë përgjegjësi të rëndësishme publike, por nuk mund të zëvendësojnë vullnetin e anëtarësisë dhe të forumeve përfaqësuese të partisë.