Ish-sulmuesi anglez Ian Wright dhe legjenda suedeze Zlatan Ibrahimoviç kanë shprehur bindjen se Shtetet e Bashkuara të Amerikës mund të jenë një nga surprizat më të mëdha të Kupës së Botës 2026.
Pasi siguruan kualifikimin në fazën e eliminimit direkt me fitoren 2:0 ndaj Australisë, amerikanët kanë rritur ndjeshëm pritshmëritë rreth paraqitjeve të tyre në turneun që po zhvillohet në vendin e tyre.
Shumë analistë kishin parashikuar një ecuri zhgënjyese për SHBA-në, por avantazhi i të qenit bashkëorganizatore e Botërorit duket se ka ndikuar pozitivisht te skuadra, e cila ka treguar vetëbesim dhe energji në dy ndeshjet e para.
Ian Wright beson se kjo gjeneratë mund të tejkalojë suksesin më të madh të amerikanëve në epokën moderne, kur arritën deri në çerekfinale në Botërorin e vitit 2002. “Mendoj se SHBA-ja do të arrijë në gjysmëfinale. Kanë një repart mbrojtës të qëndrueshëm, mesfushorë që luajnë në nivele të larta dhe një sulmues si Folarin Balogun, i cili di të shënojë gola.
Gjithashtu, kanë mbështetjen e tifozëve dhe momentumin në anën e tyre”, u shpreh Wright. Sipas tij, nëse amerikanët vazhdojnë të luajnë me të njëjtin intensitet dhe efikasitet, mund të shkojnë shumë larg në këtë Botëror. Me kualifikimin pothuajse të siguruar, SHBA-ja do të përballet me Turqinë në ndeshjen e fundit të grupit.
Turqit tashmë janë eliminuar nga gara, çka mund t’i japë trajnerit amerikan mundësinë për të menaxhuar forcat e skuadrës para fazës së nokautit. Optimist për rrugëtimin e amerikanëve u shfaq edhe Zlatan Ibrahimovic, i cili theksoi rëndësinë e mbështetjes së publikut vendas në një kompeticion të tillë. “Nëse nuk keni besuar deri tani, po e përsëris: filloni të besoni.
Ata kanë gjithë vendin pas vetes dhe kur e ke një mbështetje të tillë, është shumë e vështirë të mposhtesh” , deklaroi Ibrahimoviç. SHBA-ja po konfirmohet si një nga skuadrat më interesante të këtij Botërori dhe mbetet për t’u parë nëse parashikimet optimiste të Wright dhe Ibrahimovic do të bëhen realitet në javët e ardhshme.