Manchester Unitedi e ka identifikuar mesfushorin e Romës, Manu Koné, si objektivin kryesor në afatin kalimtar, pasi në mënyrë të papritur dështoi transferimi i Edersonit nga Atalanta. Mesfushori francez vlerësohet shumë nga drejtuesit e klubit anglez, por Roma kërkon një shumë mbi 45 milionë funte për ta lejuar largimin e tij gjatë kësaj vere.
Sipas raportimeve, Unitedi është tërhequr papritur nga marrëveshja prej 45 milionë eurosh (rreth 38 milionë funte) për Edersonin, edhe pse negociatat kishin arritur në një fazë shumë të avancuar dhe lojtari kishte përfunduar edhe kontrollet mjekësore.
Sipas “Corriere dello Sport”, drejtuesit e klubit nga “Old Trafford” e kanë zhvendosur menjëherë vëmendjen te ylli francez i Romës, Manu Koné. Lëvizja është bërë për të përforcuar sa më shpejt repartin e mesfushës, pasi Koné konsiderohet si profili ideal për kërkesat fizike të futbollit në Premierligë.
Vendimi i papritur i Unitedit për t’u tërhequr nga marrëveshja me Edersonin ka shkaktuar habi në Itali, sidomos duke pasur parasysh se palët kishin arritur marrëveshje për kushtet personale që në qershor, ndërsa Atalanta kishte pranuar një ofertë prej 40.5 milionë eurosh plus 4.5 milionë euro të tjera në formë bonusesh.
Sky Sport Italia dhe gazetari Fabrizio Romano raportojnë se klubi anglez u tërhoq pasi kërkoi teste shtesë mjekësore më të detajuara.
Megjithatë, Atalanta mbetet e bindur se dështimi i marrëveshjes erdhi si pasojë e ndryshimit të planeve të Manchester Unitedit dhe jo për shkak të ndonjë problemi fizik të Edersonit, i cili ishte në gjendje të mirë për t’u përfshirë edhe në listën e Brazilit për Kupën e Botës.
Ndërkohë, drejtori sportiv i Romës, Tony D’Amico, po menaxhon një strategji të ndërlikuar transferimesh, e cila bazohet në realizimin e fitimeve kapitale për të respektuar rregullat e Fair Play Financiar.
Sipas “Corriere dello Sport”, qëndrimi i klubit italian mbetet i pandryshuar: 55 milionë euro (rreth 47 milionë funte) është çmimi minimal për kartonin e Konés, pas paraqitjeve të tij të shkëlqyera në arenën ndërkombëtare.
Raporti shton se edhe një ofertë prej 50 milionë eurosh (rreth 42.5 milionë funte) nuk do të ishte e mjaftueshme për ta bindur Romën që ta shesë mesfushorin francez te Manchester Unitedi.