Thomas Tuchel ka bërë të ditur se Anglia do të duhet të “gjejë zgjidhje” pas problemeve të fundit me lëndime në skuadër, para ndeshjes së fundit të fazës së grupeve ndaj Panamasë në Kupën e Botës. Anglia hyn në këtë përballje me synimin për të siguruar vendin e parë në grup, pasi një fitore ndaj Panamasë pritet t’i mjaftojë për ta mbyllur fazën e grupeve në krye të tabelës.
Skuadra e Tuchel vjen pas një paraqitjeje zhgënjyese ndaj Ganës, ku nuk arriti të imponojë lojën e saj dhe pati vështirësi të mëdha për të rrezikuar kundërshtarin. Përgatitjet e Anglisë në këtë Botëror nuk kanë qenë ideale. Përveç problemeve me lëndime, Tuchel është përballur edhe me një incident të pazakontë, pasi disa pajisje të skuadrës u vodhën gjatë turneut.
Trajneri gjerman konfirmoi se Reece James nuk do të jetë në dispozicion për ndeshjen ndaj Panamasë për shkak të një problemi të lehtë në muskujt e pasmë të kofshës. “Është një problem i vogël në hamstring. Ai nuk ka mundur të stërvitet në dy ditët e fundit.
Tani është në një program të përshpejtuar rikuperimi dhe do ta vlerësojmë ndeshje pas ndeshjeje, por besojmë fuqishëm se do të jetë në dispozicion gjatë turneut”, tha Tuchel. Mungesa e James ka ngritur pyetje për zgjedhjet e Tuchel në krahët e mbrojtjes, pasi ai mori vetëm tre mbrojtës të mirëfilltë krahu në Botëror, ndërsa dy prej tyre, James dhe Tino Livramento, kanë probleme fizike.
Megjithatë, Tuchel këmbëngul se është i kënaqur me opsionet që ka në dispozicion. “Unë e kam zgjedhur këtë skuadër, prandaj jam shumë i kënaqur me gjithçka, me karakteristikat dhe cilësitë që lojtarët na japin. Natyrisht do të donim t’i kishim të gjithë lojtarët kryesorë në dispozicion, por kur kjo nuk është e mundur, ne gjejmë zgjidhje.
Ky është turne dhe duhet të ecim përpara”, deklaroi ai. Ndërkohë, lajme më pozitive vijnë për Declan Rice, Elliot Anderson dhe Bukayo Saka, të cilët kishin shqetësime gjatë javës. Rice dhe Anderson munguan në stërvitjen e së enjtes, por të tre mund të jenë të gatshëm për të nisur nga minuta e parë ndaj Panamasë.
Anglia do të kërkojë të reagojë pas paraqitjes së dobët ndaj Ganës dhe të sigurojë vendin e parë në grup para fazës me eliminim direkt.