Vita Abrashi-Kajtazi Shpërndaje në: Studim i ri i publikuar në revistën shkencore Oncoscience ka dhënë rezultate premtuese për një terapi të re kundër glioblastomës, një nga format më agresive dhe më të vështira për t’u trajtuar të kancerit të trurit, ka shkruar ScienceDaily. Studiuesit testuan nitrosylcobalaminën (NO-Cbl), një formë e modifikuar e vitaminës B12 që çliron oksid nitrik.
Qëllimi ishte të zbulohej nëse kjo substancë mund të kalojë barrierën gjak-tru dhe të grumbullohet drejtpërdrejt në tumor. Glioblastoma është një nga kanceret më vdekjeprurëse të trurit. Edhe pas operacionit, radioterapisë dhe kimioterapisë, shumica e pacientëve jetojnë mesatarisht më pak se 15 muaj pas diagnozës.
Një nga pengesat më të mëdha në trajtim është barriera gjak-tru, e cila pengon shumë ilaçe të arrijnë te tumori. Studiuesit kryen eksperimente në qeliza kancerogjene dhe te minjtë me glioblastomë.
Rezultatet kanë treguar se NO-Cbl: kaloi me sukses barrierën gjak-tru, u grumbullua kryesisht në indin tumoral dhe jo në indet e shëndetshme, qëndroi aktiv në tumor për të paktën 24 orë pas trajtimit, si dhe tregoi aktivitet kundër disa llojeve të kancerit.
Sipas studiuesve, kjo sugjeron se terapia mund të dërgojë substancën aktive drejtpërdrejt në tumor, duke dëmtuar më pak indet e shëndetshme. Në testet laboratorike, kombinimi i NO-Cbl me temozolomidin, ilaçi standard për trajtimin e glioblastomës, ose me terapinë eksperimentale TRAIL frenoi rritjen e qelizave kancerogjene dukshëm më shumë sesa secili trajtim i përdorur veçmas.
“Ky studim pilot tregon se NO-Cbl kalon barrierën gjak-tru, grumbullohet në mënyrë selektive në indin tumoral të trurit dhe vepron në sinergji me terapitë ekzistuese dhe ato eksperimentale për glioblastomën”, shkruajnë autorët. Studiuesit besojnë se kjo terapi mund të ndihmojë edhe në kapërcimin e rezistencës që glioblastoma zhvillon ndaj trajtimeve aktuale.
Sipas tyre, NO-Cbl aktivizon mekanizma që nxisin vdekjen e qelizave kancerogjene dhe pengon sinjalet që i ndihmojnë ato të mbijetojnë, duke i bërë tumoret më të ndjeshme ndaj trajtimit. Autorët theksojnë se bëhet fjalë për një studim të hershëm dhe se terapia nuk është ende gati për përdorim te pacientët.
Ata planifikojnë studime të tjera për të konfirmuar rezultatet, për të përcaktuar dozën optimale dhe për të kuptuar më mirë mënyrën se si vepron kjo terapi.
Megjithatë, rezultatet e deritanishme sugjerojnë se kjo formë e modifikuar e vitaminës B12 mund të përfaqësojë një qasje të re dhe premtuese në trajtimin e glioblastomës, duke përmirësuar shpërndarjen e ilaçeve në tru dhe duke rritur efektivitetin e terapive ekzistuese.