Erling Haaland është kthyer në një nga sulmuesit më dominues në futbollin botëror, falë kombinimit të fuqisë fizike, shpejtësisë dhe përgatitjes së jashtëzakonshme. Pas paraqitjeve të tij në Botërorin 2026, vëmendja është rikthyer te rutina e tij e ushqimit dhe stërvitjes. Sipas raportimeve të BroBible, Haaland konsumon rreth 6000 kalori në ditë për të përballuar ngarkesën e madhe fizike.
Dieta e tij bazohet kryesisht në ushqime të shëndetshme me vlera të larta ushqyese, si mish, peshk, vezë, makarona, patate, perime, qumësht dhe mishra organesh si mëlçia dhe zemra. Një ditë tipike ushqimore për sulmuesin norvegjez përfshin vezë dhe bukë në mëngjes, peshk me oriz dhe perime gjatë drekës, ndërsa në darkë konsumon shpesh mish të kuq si ribeye steak, patate dhe sallatë.
Përveç dietës, përgatitja fizike është një tjetër faktor i rëndësishëm. Sipas analizës së ekspertit të shkencave të ushtrimit Dr. Mike Israetel, Haaland fokusohet në tre elemente kryesore: forcën e pjesës së përparme të trupit, fuqinë shpërthyese dhe zinxhirin posterior (gluteus, hamstrings dhe shpinë), të cilat ndihmojnë në sprint, kërcime dhe shmangien e dëmtimeve.
Israetel thekson: “Stërvitja sportive është ajo që të bën më të mirë në sport”, duke nënvizuar se palestra është vetëm një mbështetje për aftësitë teknike dhe jo zëvendësim i tyre. Haaland gjithashtu i kushton rëndësi mobilitetit dhe rikuperimit, pasi fleksibiliteti ndihmon në uljen e rrezikut të dëmtimeve dhe përmirësimin e lëvizjeve në situata ekstreme gjatë ndeshjeve.
Ekspertët paralajmërojnë se rutina e Haaland nuk duhet kopjuar verbërisht nga sportistët amatorë. Sasia e madhe e kalorive dhe ngarkesa e stërvitjes janë të përshtatura për një atlet profesionist që stërvitet çdo ditë dhe ka një konsum shumë të lartë energjie.