Trajneri i Ganës, Carlos Queiroz, ka hedhur poshtë çdo ide se skuadra e tij mund të luajë për një rezultat që do t`i siguronte një kundërshtar më të lehtë në fazën me eliminim direkt të Kupës së Botës. Gana e ka siguruar tashmë kualifikimin në mesin e tridhjetë e dy kombëtareve më të mira dhe të shtunën do të përballet me Kroacinë në ndeshjen e fundit të fazës së grupeve.
Në konferencën për shtyp para takimit, trajneri portugez ka theksuar se skuadra e tij ka vetëm një objektiv. “Mënyra e vetme për ta luajtur futbollin është të luash për fitore. Ne mendojmë vetëm për Kroacinë dhe duam të bëjmë një paraqitje të mirë. Do të luftojmë më shumë se kundërshtari dhe do të përpiqemi të jemi skuadra më e mirë në fushë”, ka deklaruar Queiroz.
Ai ka shtuar se nuk merret me llogaritë se cili vend në grup do t’i sillte një kundërshtar më të favorshëm. “Vendimet për renditjen do të merren pasi të përfundojë ndeshja. Tani kemi vetëm një sfidë në mendje dhe ajo është Kroacia” , ka thënë ai. Queiroz ka vlerësuar cilësinë e kroatëve, duke theksuar se humbja 4:2 ndaj Anglisë nuk pasqyron forcën reale të kësaj skuadre.
“Kroacia meritonte një rezultat më të mirë ndaj Anglisë. Prandaj duhet të jemi maksimalisht të përqendruar. Për të fituar, duhet të jemi më të fortë dhe më të mirë gjatë gjithë nëntëdhjetë minutave,” ka thënë trajneri i Ganës.