Manchester City po hyn në një fazë vendimtare të afatit kalimtar veror, teksa kampionët anglezë synojnë të vazhdojnë përforcimet pas arritjes së marrëveshjes për transferimin e Elliot Anderson nga Nottingham Forest. Sipas raportimeve, City ka rënë dakord të paguajë 134 milionë euro për Andersonin, një shifër rekord për futbollin britanik.
Mesfushori anglez tashmë ka kryer kontrollat mjekësore në Kansas dhe pritet të nënshkruajë një kontratë pesëvjeçare me klubin nga “Etihad Stadium”. Anderson po kalon një formë të shkëlqyer edhe me kombëtaren e Anglisë në Kupën e Botës dhe pritet të jetë titullar në ndeshjen ndaj Republikës Demokratike të Kongos, në fazën e 1/16 së finales.
Megjithatë, ai nuk është objektivi i vetëm i madh i Manchester Cityt. Sipas The Chronicle , klubi ka hyrë në garë edhe për mesfushorin e Newcastle United, Sandro Tonali. Raporti thekson se City ka kapacitet financiar për të realizuar edhe një transferim të rëndësishëm gjatë kësaj vere, sapo marrëveshja për Andersonin të zyrtarizohet.
Reprezentuesi italian është një nga emrat kryesorë në listën e dëshirave të klubit. Nga ana tjetër, Tonali ka arritur një marrëveshje në parim me Tottenhamin për një pagë javore prej 318 mijë eurosh, në kuadër të një kontrate gjashtëvjeçare. Megjithatë, klubi londinez po has vështirësi në përmbushjen e kërkesave financiare të Newcastle.
Një ofertë prej 93 milionë eurosh e Tottenhamit është refuzuar, ndërsa Newcastle kërkon rreth 116 milionë euro për kartonin e 26-vjeçarit. Në këto rrethana, Manchester City konsiderohet një kandidat serioz për transferimin e Tonalit nga “St James’ Park”, pavarësisht se tashmë ka rënë dakord të investojë një shumë rekord për Andersonin.
Nëse realizohen të dy transferimet, dyshja Sandro Tonali–Elliot Anderson pritet të krijojë një nga mesfushat më cilësore në futbollin evropian. Sinjali – aty ku e vërteta flet para lajmit!