Më shumë se 100 pasagjerë dhe rreth 23 anëtarë të ekuipazhit në një anije të Princess Cruises janë sëmurë nga një shpërthim i dyshuar i norovirusit, sipas Qendrave për Kontrollin dhe Parandalimin e Sëmundjeve (CDC), duke shënuar shpërthimin e tretë që godet një nga anijet e kompanisë këtë vit.
Anija “Ruby Princess” u nis më 12 qershor nga San Francisco, me destinacion Alaskën dhe Kanadanë, dhe kthimi ishte planifikuar më 2 korrik. Më shumë se dy javë pas nisjes së udhëtimit, zyrtarët e CDC-së morën raportin për shpërthimin, i cili konsiderohet kur sëmuren 3% ose më shumë e pasagjerëve. Në bord ndodheshin 3,032 pasagjerë dhe 1,144 anëtarë ekuipazhi, sipas CDC-së.
Anija është ankoruar në San Francisco të enjten për dezinfektim, raporton theguardian – transmeton Sinjali. Norovirusi është shumë ngjitës dhe mund të shkaktojë diarre dhe të vjella. Ai përhapet kur grimca të vogla të feçeve ose të vjellave hyjnë në gojë. Kontakti dorë-me-gojë me sipërfaqe të kontaminuara gjithashtu mund të ndihmojë përhapjen e sëmundjes.
Një zëdhënës i Princess Cruises nuk ka dhënë menjëherë një koment lidhur me shkaqet e mundshme të shpërthimit. Zyrtarët shëndetësorë rekomandojnë larje të rregullt të duarve me sapun dhe ujë, veçanërisht pas përdorimit të tualetit ose para ngrënies, për të parandaluar përhapjen e mikrobeve.
Anijet turistike, ku pasagjerët qëndrojnë në afërsi të ngushtë, mund të shërbejnë si vatër e përhapjes së sëmundjeve. Këtë vit janë regjistruar edhe gjashtë shpërthime të tjera të norovirusit në anije turistike. Në “Ruby Princess”, pasagjerët dhe ekuipazhi i sëmurë janë izoluar ndërsa vazhdon dezinfektimi i anijes. Sinjali – aty ku e vërteta flet para lajmit!