Bashkimi Evropian ka emëruar diplomatin gjerman Dirk Schuebel si ambasadorin e ri në Kosovë, ndërsa ai pritet të marrë zyrtarisht detyrën më . Schuebel vjen me një karrierë mbi tri dekada në diplomacinë evropiane, duke mbajtur një sërë funksionesh të rëndësishme në Shërbimin Evropian për Veprim të Jashtëm (EEAS), Komisionin Evropian dhe Ministrinë e Punëve të Jashtme të Gjermanisë.
Aktualisht, ai ushtron detyrën e Shefit të Divizionit për Rusinë në EEAS, ndërsa më herët ka qenë i Dërguar Special i Bashkimit Evropian për Partneritetin Lindor dhe Shef i Delegacionit të BE-së në Bjellorusi.
Diplomati gjerman ka shërbyer gjithashtu si ambasador i BE-së në Moldavi dhe ka mbajtur poste kyçe në Kiev, ku ishte përgjegjës për çështjet politike, marrëdhëniet me Ukrainën dhe Bjellorusinë.
Gjatë karrierës së tij, Schuebel është angazhuar kryesisht në politikat e Bashkimit Evropian për Evropën Lindore, Rusinë dhe Partneritetin Lindor, ndërsa ka punuar edhe në fushat e zgjerimit, tregtisë dhe energjisë.
Sipas Bashkimit Evropian, emërimi i tij synon të vazhdojë mbështetjen për procesin e integrimit evropian të Kosovës dhe forcimin e bashkëpunimit ndërmjet BE-së dhe institucioneve të vendit. Sinjali – aty ku e vërteta flet para lajmit!