Një shprehje prej vetëm katër fjalësh e ish-kryeministrit të Spanjës, Mariano Rajoy, ka shkaktuar polemika të mëdha në Spanjë dhe Francë, vetëm pak ditë para përballjes mes dy kombëtareve në gjysmëfinalen e Kupës së Botës 2026.
Në një opinion të botuar në gazetën El Debate , Rajoy e përshkroi Francën si një kundërshtar të fortë, por shtoi frazën “eso sí, sin franceses” (“por pa francezë”), duke lënë të kuptohet se shumë prej futbollistëve francezë kanë prejardhje nga ish-kolonitë franceze ose kanë lindur jashtë Francës.
Deklarata u dënua menjëherë nga kryeministri spanjoll Pedro Sánchez, i cili shkroi në rrjetin social X se “Spanja u përket atyre që e duan dhe punojnë për të, jo atyre që e turpërojnë me deklarata ksenofobe”, duke shtuar se shpreson që “racizmi të mposhtet”. Edhe nga Franca reagimet ishin të ashpra.
Ministrja për Barazi dhe Luftën kundër Diskriminimit, Aurore Bergé, i cilësoi komentet si “shpërthime të papranueshme raciste”, ndërsa sekretari kombëtar i Partisë Komuniste Franceze, Fabien Roussel, kërkoi që Rajoy të dënohet për deklaratat e tij.
Nga ana tjetër, Rajoy mohoi se kishte qëllime raciste, duke deklaruar se fjalët e tij janë nxjerrë jashtë kontekstit dhe se nuk dëshiron të përfshihet në debat politik. Edhe Partia Popullore e Spanjës mbrojti ish-liderin e saj, duke thënë se komenti ishte thjesht ironik.
Ambasada e Francës në Madrid reagoi gjithashtu, duke theksuar se të gjithë futbollistët e përfaqësueses franceze janë shtetas francezë. Sipas saj, 23 nga 26 lojtarët janë lindur në Francë, ndërsa vetëm tre kanë lindur jashtë vendit, por të gjithë kanë shtetësi franceze. Ironikisht, edhe kombëtarja e Spanjës ka futbollistë të lindur jashtë vendit ose me origjinë të huaj.
Aymeric Laporte ka lindur në Francë, ndërsa yjet Lamine Yamal dhe Nico Williams kanë rrënjë afrikane. Polemika ka rritur edhe më shumë tensionin përpara ndeshjes së madhe mes Spanjës dhe Francës, me debatin që tashmë ka kaluar nga fusha e futbollit në arenën politike. Sinjali – aty ku e vërteta flet para lajmit!