Imazhe satelitore të siguruara dhe analizuara nga CNN në bashkëpunim me Institutin për Shkencë dhe Siguri Ndërkombëtare (Institute for Science and International Security) tregojnë shenja se Irani mund të ketë nisur rindërtimin e disa prej objekteve të tij bërthamore.
Sipas analizës së ekspertëve, aktivitetet e vërejtura në disa lokacione bërthamore iraniane ngrenë pikëpyetje nëse Teherani ka respektuar kushtet e memorandumit të mirëkuptimit të nënshkruar me Shtetet e Bashkuara në fund të muajit qershor.
Të dhënat e nxjerra nga imazhet satelitore sugjerojnë se në disa prej këtyre objekteve janë zhvilluar lëvizje dhe punime që mund të lidhen me përgatitjet për rikonstruksion ose rikthim të kapaciteteve të dëmtuara.
Dyshimet janë shtuar edhe për shkak se këto aktivitete dyshohet se kanë nisur përpara deklaratës së presidentit amerikan Donald Trump për përfundimin e marrëveshjes së përkohshme dhe urdhërimit të sulmeve të reja ndaj Iranit.
Raporti i CNN, i përgatitur në bashkëpunim me Institutin për Shkencë dhe Siguri Ndërkombëtare, bazohet në analizën e pamjeve satelitore dhe vlerësimet e ekspertëve të sigurisë ndërkombëtare, të cilët po monitorojnë nga afër zhvillimet në objektet bërthamore të Iranit.
Ekspertët theksojnë se aktivitetet e reja nuk përbëjnë ende provë përfundimtare se Irani ka rifilluar programin e tij bërthamor, por ato kërkojnë monitorim të vazhdueshëm dhe verifikime të mëtejshme ndërkombëtare. Sinjali – aty ku e vërteta flet para lajmit!