Harry Kane ishte edhe një herë heroi i Anglisë, duke realizuar dy gola në përmbysjen 2-1 ndaj Republikës Demokratike të Kongos, por paraqitja e “Tre Luanëve” ngriti shumë pikëpyetje. Pavarësisht kualifikimit në 1/8 e finales të Kupës së Botës 2026, skuadra e Thomas Tuchelit tregoi se është ende larg nivelit të nevojshëm për të luftuar seriozisht për trofeun.
Fituesi: Harry Kane Kapiteni anglez dëshmoi edhe një herë pse konsiderohet një nga sulmuesit më të mirë në botë. Edhe pse ishte pak i përfshirë në lojë gjatë pjesës më të madhe të ndeshjes, ai u shfaq në momentet vendimtare. Goli i parë erdhi me një goditje të saktë me kokë pas një asistimi të Anthony Gordon, ndërsa i dyti ishte një goditje spektakolare nga distanca, që vulosi përmbysjen.
“Kapiteni ynë është lideri ynë. Ai vendosi ndeshjen me dy finalizime të jashtëzakonshme. Goli i dytë ishte thjesht brilant”, deklaroi Thomas Tuchel. Humbësi: Shpresat e Anglisë për titull Edhe pse Anglia fitoi, paraqitja ndaj një kundërshtari si Republika Demokratike e Kongos nuk ishte bindëse.
Skuadra afrikane u mbrojt me disiplinë dhe goditi në kundërsulm, duke i shkaktuar shumë probleme anglezëve. Përballë kombëtareve më të forta, një performancë e tillë mund të rezultojë fatale. Anglia e nisi ndeshjen dobët, reagoi vetëm në minutat e fundit dhe edhe në pjesën e dytë pati vështirësi të mëdha për të krijuar raste të pastra.
Anthony Gordon ndryshoi rrjedhën e takimit pasi u aktivizua nga stoli. Anësori anglez asistoi në të dy golat e Harry Kane dhe solli energji të re në repartin ofensiv. Ai dëshmoi se mund të jetë një armë shumë e rëndësishme për Tuchelin në vazhdim të turneut. Humbësit: Anësorët titullarë Marcus Rashford nuk arriti të shfrytëzonte mundësinë e dhënë nga trajneri.
Përveç një rasti të larguar nga vija fatale, ai nuk pati ndikimin e pritur. Edhe Noni Madueke zhgënjeu. Përveç se nuk ishte efikas në sulm, ai u kritikua edhe për mungesën e kontributit në mbrojtje, çka ndikoi edhe te goli i parë i Kongos. Fituesi: Thomas Tuchel Edhe pse pas ndeshjes refuzoi të merrte meritat, vendimet e Tuchelit rezultuan vendimtare.
Zëvendësimet e Gordonit dhe Eberechi Ezes ndryshuan lojën, ndërsa ndryshimet taktike në pjesën e dytë i dhanë më shumë balancë skuadrës. Po ashtu, fjalimi i tij gjatë ndërprerjes për hidratim në pjesën e dytë duket se ndikoi te reagimi i futbollistëve. “Mesazhi ishte i thjeshtë: vazhdoni të besoni, vazhdoni të luftoni dhe mos u dorëzoni”, tha trajneri anglez.
Humbësi: Jordan Pickford Portieri i Anglisë nuk pati shumë punë gjatë ndeshjes, por në momentin vendimtar nuk reagoi siç duhej. Goditja e Brian Cipengas në shtyllën e afërt përfundoi në rrjetë, një situatë ku Pickford pritej të bënte më shumë. Anglia nuk e pagoi këtë gabim falë dy golave të Kane, por ndaj kundërshtarëve më cilësorë gabime të tilla mund të kushtojnë shumë shtrenjtë.
Megjithëse Anglia vazhdon rrugëtimin në Kupën e Botës dhe tani e pret sfida ndaj Meksikës, paraqitja ndaj Republikës Demokratike të Kongos tregoi se skuadra e Thomas Tuchelit duhet të përmirësohet ndjeshëm nëse dëshiron të rikthejë trofeun botëror pas 60 vitesh.