Një grup eurodeputetësh ka kërkuar nisjen e një hetimi ndaj FIFA-s, për të sqaruar nëse administrata e presidentit amerikan, Donald Trump, ka ndikuar në vendimin për heqjen e pezullimit të sulmuesit të SHBA-së, Folarin Balogun.
Sipas një letre që po qarkullon në Parlamentin Evropian, eurodeputetët kërkojnë nga 27 federatat e futbollit të vendeve të Bashkimit Evropian që t’i kërkojnë zyrtarisht FIFA-s të hetojë procesin e vendimmarrjes për këtë rast.
Nisma synon gjithashtu të sqarojë rolin e presidentit të FIFA-s, Gianni Infantino, në vendimin që lejoi Balogun të luante në ndeshjen e 1/8 së finales së Kupës së Botës ndaj Belgjikës, të cilën SHBA-ja e humbi me rezultat 4:1. Balogun ishte ndëshkuar me karton të kuq në ndeshjen kundër Bosnje e Hercegovinës dhe, sipas rregullave, duhej të mungonte një ndeshje.
Megjithatë, FIFA pezulloi zbatimin e dënimit duke përdorur një procedurë që, sipas raportimeve, nuk ishte aplikuar më parë në një Kampionat Botëror.
Presidenti amerikan Donald Trump pranoi se kishte biseduar me Infantinon për rastin e Balogun, duke e cilësuar kartonin e kuq si të padrejtë, por mohoi se kishte ushtruar presion për ndryshimin e vendimit, raporton Euronews, transmeton Sinjali. Rasti ka shkaktuar reagime të forta në Evropë.
UEFA e cilësoi vendimin si “të paprecedent, të pakuptueshëm dhe të pajustifikueshëm”, ndërsa Federata Belge e Futbollit ka kundërshtuar zyrtarisht të drejtën e Balogun për të luajtur. Në letrën e eurodeputetëve kërkohet gjithashtu që zyrtarët e lartë të FIFA-s të mbajnë përgjegjësi nëse provohet se kanë shkelur rregullat për neutralitet politik.
Nisma po mbledh nënshkrime në Parlamentin Evropian para se t’u dërgohet federatave kombëtare të futbollit të vendeve anëtare të Bashkimit Evropian. Sinjali – aty ku e vërteta flet para lajmit!