Ministrja në detyrë e Kulturës dhe Turizimit, Saranda Bogujevci ka pritur në takim Kaltrina Mehmetin, kryesuese e KMRS-së, ku në fokus të takimit ishin të drejtat e autorit në Kosovë.
“Takim i këndshëm me kryesuesen e Organizatës për Menaxhim Kolektiv të të Drejtave të Autorit në Fushën e Muzikës (KMRS), Kaltrina Mehmeti, me të cilën diskutuam për forcimin e sistemit të mbrojtjes së të drejtave të autorit dhe të drejtave të përafërta në fushën e muzikës” , ka shkruar Bogujevci.
Ajo tha se gjatë takimit u diskutua për sfidat dhe prioritetet në funksionimin e menaxhimit kolektiv, zbatimin e të drejtave të autorit, si dhe rëndësinë e një sistemi të drejtë dhe transparent që garanton mbrojtje dhe kompensim të merituar për krijuesit.
Bogujevci shtoi se u theksua edhe rëndësia e bashkëpunimit ndërinstitucional dhe ndërkombëtar për avancimin e standardeve në këtë fushë dhe mbështetjen e zhvillimit të industrisë kreative në Kosovë.