Shpërndaje në: Gjykata e Apelit në Paris ka lënë në fuqi fajësinë e politikanes franceze dhe njërës nga figurat më të njohura të së djathtës në Francë, Marine Le Pen, në çështjen e keqpërdorimit të fondeve të Parlamentit Evropian, por ka zbutur dënimin e saj.
Sipas vendimit, ndalimi për të ushtruar funksione publike është reduktuar në mënyrë efektive në 15 muaj, ndërsa 30 muajt e tjerë janë pezulluar. Duke qenë se ndalimi ka nisur më , ai pritet të përfundojë përpara zgjedhjeve presidenciale franceze të planifikuara për prillin e vitit 2027, duke i hapur rrugën Le Pen që të kandidojë, raporton The Guardian.
Gjykata ka ulur gjithashtu dënimin me burg në tre vjet, nga të cilat dy janë me kusht, ndërsa një vit do të kryhet nën mbikëqyrje elektronike me byzylyk elektronik. Gjoba prej 100 mijë eurosh mbetet në fuqi.
Çështja lidhet me përdorimin e fondeve të Parlamentit Evropian gjatë periudhës 2004–2016 për të paguar punonjës të partisë së saj, National Rally, të cilët sipas prokurorisë dhe gjykatës nuk kryenin detyra si asistentë parlamentarë, por punonin për partinë në Francë. Marine Le Pen i ka mohuar vazhdimisht akuzat, duke këmbëngulur se fondet janë përdorur në mënyrë të ligjshme.
Megjithëse vendimi i hap mundësinë ligjore për të marrë pjesë në garën presidenciale, detyrimi për të mbajtur byzylykun elektronik mund ta vështirësojë ndjeshëm zhvillimin e fushatës së saj elektorale, si për arsye praktike ashtu edhe për ndikimin në imazhin politik.
Më herët, Le Pen kishte deklaruar se nuk do të kandidonte nëse do të detyrohej të mbante një pajisje të tillë, por ende nuk ka bërë të ditur nëse do ta ndryshojë këtë qëndrim pas vendimit të gjykatës.
Marine Le Pen pritet të sqarojë pozicionin e saj gjatë një interviste në televizionin TF1, ku pritet të njoftojë nëse do të vazhdojë ose jo me kandidaturën për zgjedhjet presidenciale të vitit 2027. Në rast se ajo tërhiqet, Jordan Bardella konsiderohet kandidati më i mundshëm i partisë National Rally. Le Pen, ka kandiduar tre herë për presidente të Francës, në vitin 2012, 2017 dhe 2022.
Në zgjedhjet e vitit 2022, ajo arriti në balotazh kundër Emmanuel Macron, por u mposht, duke marrë rreth 41.5% të votave, rezultati më i mirë ndonjëherë për partinë e saj në një garë presidenciale.