Kupola e nxehtësisë që ka kapluar Evropën do të mbetet e fuqishme dhe gjatë fundjavës do të zhvendoset ngadalë drejt Evropës Qendrore. Të premten, sipas CNN, temperaturat më të larta se normalja do të shtrihen nga Anglia dhe Franca Qendrore, përmes vendeve të Beneluksit dhe deri në Gjermani.
Temperaturat do të jenë 10 deri në 15°C mbi mesataren klimatike në të gjithë rajonin, ndërsa vlerat maksimale do të arrijnë gjerësisht nga 35°C deri mbi 40°C. Kulmi i valës së të nxehtit pritet të jetë të shtunën në Gjermani, ku shumë qytete mund të regjistrojnë temperatura deri në 40°C.
Në pjesë të Mbretërisë së Bashkuar dhe Francës temperaturat do të ulen pak të premten dhe të shtunën, por lehtësimi më i ndjeshëm pritet të vijë të dielën, pasi kupola e nxehtësisë do të vazhdojë lëvizjen drejt lindjes. Nga Gjermania dhe Italia, deri në Austri, Çeki, Hungari dhe Poloni, temperaturat do të mbeten shumë të larta, duke arritur gjerësisht 35-40°C.
Në Evropën Lindore, devijimet pozitive të temperaturës do të fillojnë të zbuten gradualisht, megjithatë gjatë pjesës më të madhe të javës së ardhshme temperaturat do të vazhdojnë të jenë 5 deri në 10°C mbi mesataren për këtë periudhë të vitit.