Të gjithë trenat e Hekurudhave Gjermane (Deutsche Bahn – DB) janë ndalur plotësisht pas një defekti serioz teknik në sistemin e komunikimit radio GSM-R, i cili përdoret për menaxhimin e trafikut hekurudhor. Për shkak të këtij problemi, linjat janë ndërprerë përkohësisht, ndërsa trenat janë ndalur në stacione ose në pika të sigurta të rrjetit.
Teknikët janë duke punuar për riparimin e defektit, i cili tashmë ka shkaktuar vonesa dhe anulime të shumta në të gjithë vendin. Sipas kompanisë, problemi është regjistruar në sistemin GSM-R, që mundëson komunikimin mes trenave dhe qendrave të kontrollit të trafikut. Për arsye sigurie, qarkullimi është pezulluar menjëherë, duke bërë që i gjithë trafiku hekurudhor të ndalet përkohësisht.
Një zëdhënës i Deutsche Bahn ka bërë të ditur se bëhet fjalë për një mosfunksionim teknik dhe se ekipet janë duke punuar intensivisht për zgjidhjen e tij. Prioritet, sipas kompanisë, mbetet siguria e pasagjerëve dhe funksionimi i sigurt i rrjetit hekurudhor, prandaj është vendosur ndalimi i përkohshëm i lëvizjes deri në rikthimin e plotë të sistemit.
Deutsche Bahn paralajmëron se ndërprerja pritet të shkaktojë vonesa të konsiderueshme dhe anulime të shumta në gjithë rrjetin, ndërsa ende nuk është bërë e ditur shkalla e plotë e problemit. Sinjali – aty ku e vërteta flet para lajmit!