Flutura Gashi-Mehmeti Shpërndaje në: Kandidati i ekstremit të djathtë, Abelardo de la Espriella, i cili ishte mbështetur nga presidenti amerikan Donald Trump, ka fituar zgjedhjet presidenciale në Kolumbi, bazuar në numërimin paraprak të dielën, duke siguruar një avantazh të ngushtë ndaj rivalit të tij të mbështetur nga qeveria, Ivan Cepeda.
De la Espriella ka shpallur fitoren, duke u thënë mbështetësve të mbledhur në qytetin bregdetar të Barranquillas se ky rezultat “historik” do të “ndryshojë përgjithmonë rrjedhën e historisë së Kolumbisë”. Megjithatë, rivali i tij, Cepeda, u ka bërë thirrje votuesve të presin numërimin përfundimtar dhe ligjërisht të detyrueshëm.
Një qeveri e drejtuar nga de la Espriella do të përfaqësonte një zhvendosje të madhe djathtas në politikën kolumbiane dhe mund të riformësonte marrëdhëniet e vendit me Shtetet e Bashkuara, pas tensioneve midis Trumpit dhe presidentit të majtë të Kolumbisë, Gustavo Petro.
I njohur me nofkën “El Tigre” (“Tigri”), de la Espriella, i cili e përshkruan veten si konservator, ka premtuar një qasje më të ashpër ndaj organizatave kriminale, lidhje më të forta sigurie me SHBA-në, ulje taksash, zgjerim të kërkimeve për naftë dhe liberalizim ekonomik.
Me 99.91% të votave të numëruara në balotazhin e së dielës, rezultati paraprak tregonte se avokati dhe biznesmeni 47-vjeçar kishte fituar 49.65% të votave, me një diferencë prej më pak se 250,000 votash ndaj Cepedës, i cili mori 47.81% të mbështetjes. De la Espriella ka thënë se kishte marrë tashmë urime nga Trumpi, i cili “shprehu mbështetjen dhe njohjen e fitores sonë”.
“Ai fitoi, bindshëm!”, ka shkruar Trump në rrjetin social Truth Social të dielën vonë në mbrëmje, duke shpërndarë një artikull mbi rezultatet. Sekretari amerikan i Shtetit, Marco Rubio, ka thënë se kishte biseduar me de la Espriellan dhe e kishte uruar për fitoren.
“Administrata Trump pret me padurim të punojë ngushtë me qeverinë tuaj të ardhshme për të avancuar bashkëpunimin rajonal në siguri, për t’i dhënë fund emigracionit të paligjshëm drejt Shteteve të Bashkuara dhe për të forcuar lidhjet tona ekonomike”, ka shkruar Rubio në X.
Por Petro, presidenti në largim i Kolumbisë, i cili kishte mbështetur kandidatin rival Cepeda, ka paralajmëruar se “askush nuk mund të shpallet ende president” për shkak të diferencës së ngushtë. Vetë Cepeda u ka thënë mbështetësve të tij se numërimi “ende nuk është zyrtar dhe as ligjërisht detyrues” dhe se do të presë rezultatet përfundimtare të numërimit zyrtar të votave.