Qeveria italiane ka miratuar një dekret të ri për sigurinë, duke ashpërsuar masat ndaj personave që përfshihen në akte dhune gjatë demonstratave publike. Vendimi vjen pas plaçkitjeve në Milano dhe trazirave të regjistruara në rrugët e disa qyteteve italiane.
Paketa e re parashikon krijimin e veprës së re penale të quajtur “Dhuna e Organizuar në Demonstratat Publike”, zgjerimin e masave të paraburgimit parandalues, sanksione më të ashpra për të miturit dhe vendosjen e 500 ushtarakëve shtesë në Milano.
Dekreti përmban tetë nene dhe parashikon dënime nga dy deri në pesë vite burg për personat që, gjatë protestave, përdorin shkopinj ose hedhin sende duke rrezikuar sigurinë e të tjerëve. Krahas dënimit me burg, parashikohet edhe një gjobë deri në 20 mijë euro.
Sanksionet do të ashpërsohen në rastet kur autorët kanë fytyrën e mbuluar ose kur dhuna shkakton dëme në infrastrukturë dhe shërbime publike. Ndërkohë, personat që organizojnë ose promovojnë, edhe përmes internetit dhe mjeteve elektronike, krijimin e grupeve me qëllim nxitjen e demonstratave të dhunshme mund të dënohen me katër deri në 12 vite burg.
Një tjetër pikë e rëndësishme e dekretit lidhet me zgjerimin e paraburgimit parandalues për personat që cenojnë sigurinë në vende ku ka përqendrim të madh njerëzish. Masa mund të zbatohet edhe ndaj të miturve që kanë mbushur 16 vjeç.
Parashikohet gjithashtu zgjerimi i mundësive për arrestimin e personave të kapur në flagrancë, ndërsa një projektligj tjetër parashikon përgjegjësi penale për të miturit mbi 14 vjeç pa kërkuar një vlerësim të veçantë të aftësisë së tyre mendore në momentin e kryerjes së veprës.
Për prindërit e të miturve që kryejnë akte dhune gjatë demonstratave parashikohen gjoba nga 500 deri në 1,000 euro, të cilat dyfishohen në rast përsëritjeje të shkeljeve, edhe kur prindërit nuk kanë përgjegjësi penale.
Dekreti i jep gjithashtu mundësi autoriteteve të policisë të ndalojnë grumbullimet e të miturve në rastet kur pesë ose më shumë persona shfaqin sjellje kërcënuese në vende publike ose të hapura për publikun.
Masat parandaluese mund të zbatohen edhe ndaj personave që kanë kryer akte të caktuara dhune ose dëmtimi të pronës gjatë pesë viteve të fundit, sipas kushteve të përcaktuara në dispozitat e reja. Një nga masat konkrete të paketës është vendosja e menjëhershme e 500 ushtarakëve shtesë në Milano deri më 31 dhjetor, me një kosto prej 4.7 milionë eurosh.
Ministri i Brendshëm italian, Matteo Piantedosi, bëri të ditur se personeli ushtarak do të vihet në dispozicion të autoriteteve të sigurisë publike për të ndihmuar në kontrollin territorial dhe garantimin e rendit.
Sipas tij, përdorimi i këtyre burimeve do të diskutohet në Komitetin Provincial për Rendin dhe Sigurinë Publike në Milano, ku do të përcaktohen detyrat konkrete dhe mënyra e angazhimit të tyre. Me këtë paketë, qeveria italiane synon të forcojë kontrollin e sigurisë publike dhe të parandalojë përsëritjen e episodeve të dhunshme gjatë protestave.