Kostoja e ndërtimit të objekteve rezidenciale në Gjermani shënoi një rritje të dukshme në gusht duke tejkaluar ndjeshëm rritjen e çmimeve të konsumit, njoftoi sot zyra statistikore Destatis. Çmimet e ndërtimit për ndërtesat rezidenciale të ndërtuara me metoda tradicionale u rritën 5,5 për qind në gusht krahasuar me të njëjtin muaj të vitit të kaluar.
Në maj, muaji i mëparshëm i raportimit për të cilin Destatis publikoi të dhëna, çmimet ishin 5 për qind më të larta në baza vjetore. Hera e fundit që u regjistrua një rritje kaq e theksuar e çmimeve në këtë sektor ishte tri vjet më parë.
Çmimet në gusht ishin një për qind më të larta se në maj, raportoi zyra statistikore, duke theksuar se të gjitha shifrat i referohen punimeve të ndërtimit në objekte, përfshirë tatimin mbi vlerën e shtuar. Ndër llojet e punimeve që përjetuan rritje veçanërisht të fortë të çmimeve, spikasin punimet e çatisë, me kosto që u rritën 7,6 për qind krahasuar me gushtin e vitit të kaluar.
Pasuan punimet e zdrukthëtarisë dhe ato të ndërtimit me dru, me një rritje prej 7,2 për qind. Në segmentin e punimeve të përfundimit të brendshëm, faktorët kryesorë të rritjes së çmimeve ishin kostot më të larta për instalimet elektrike dhe sistemet e ngrohjes, të cilat u rritën përkatësisht 7,2 për qind dhe 5,2 për qind.
Si pasojë, u rrit edhe kostoja e mirëmbajtjes së ndërtesave rezidenciale, duke shënuar një rritje prej 6 për qind krahasuar me gushtin e vitit të kaluar. Në muajin gusht, kostot e ndërtimit u rritën në mënyrë dukshëm më të theksuar sesa çmimet e mallrave dhe shërbimeve të konsumit, të cilat ishin mesatarisht 2,9 për qind më të larta krahasuar me një vit më parë.
Sipas Destatis, rritja e çmimeve përfshin gjithashtu ndërtimin e rrugëve, ku kostot u rritën 6,9 për qind dhe ndërtimin e objekteve tregtare 5,7 për qind.