Investohet shumë në Kosovë, ndërsa detajet dhe rrethanat që e shoqëruan finalen e Superkupës në basketboll e tregojnë më së miri këtë, e nis tekstin mediumi malazez “Vijesti”. Ky medium befasohet nga atmosfera e shqiptarëve të Republikës së Kosovës. “Prizreni në këmbë, presidenti i klubit qau nga gëzimi – trofeu i parë i Igor Jovoviq me Bashkimin”, është titulli i mediumit malazez.
“Qyteti i vjetër i Prizrenit ishte mbrëmë në këmbë. Një numër i madh tifozësh e pritën autobusin me basketbollistët e Bashkimit, të cilët fituan trofeun e parë pas një kohe shumë të gjatë. Skuadra e drejtuar nga ish – trajneri i Buduçnosti, Igor Jovoviq, e mposhti dhe i dha fund dominimit të Trepçës në një finale që tifozët e Bashkimit do ta kujtojnë gjatë”, ka shkruar më tej.
“Për shkak të hedhjes së sendeve në fushë, palestra u zbraz ende në fund të pjesës së parë, ndërsa drama vazhdoi por këtë herë në parket”, shkruan media malazeze. Jovoviq i përshkruan detajet: “ Gjatë gjithë kohës ishim në ndjekje të rezultatit ndaj një ekipi që dominon dhe që ka fituar gjithçka gjatë pesë viteve të fundit.
Në bankën e tyre është trajneri i kombëtares së Bosnjë-Hercegovinës, Adis Beçiragiç. Arritëm ta përmbysnim rezultatin dhe një sekondë para fundit shënuam një treshe për epërsinë prej tri pikësh”, tregon Jovoviq. Por kjo nuk ishte fundi, ishte vetëm fillimi i dramës. “Mbeti edhe një sekondë deri në fund dhe ne pësuam një treshe.
E shënoi qendra e tyre nga gjysma e fushës së vet, madje duke goditur tabelën ”, tha Jovoviq. Për shumë ekipe, një goditje e tillë do të ishte një tronditje nga e cila nuk do të mund të riktheheshin në vazhdime. Por jo për Bashkimin e Jovoviqit. “Po, ishte një tronditje, por u qetësuam, biseduam gjatë pushimit, u ngritëm mentalisht dhe në vazhdime e përfunduam punën” , tha ai.
Kamera e fokusoi presidentin e klubit, me lot në sy, si dëshmi se sa shumë do të thotë ky sukses për Bashkimin. “Ky trofe u prit gjatë, shumë gjatë. Spektakli i vërtetë ndodhi pas kthimit në Prizren, ku na pritën tifozët, natyrisht”. “Në Kosovë luhet basketboll i mirë dhe investohet shumë, ndërsa Jovoviq me Bashkimin po hyn në sezonin e tij të dytë”, shkruan mediumi malazez.
“Këtë sezon kemi edhe një ekip shumë të mirë. Ka ardhur ish-lojtari i Splitit, Shorter, i cili është një përforcim i madh, por edhe Jajuan Johnson, i cili dikur, së bashku me David Blattin te Darussafaka, e ka fituar Eurokupën.” “Tani kemi një ekip serioz dhe shkojmë në ndjekje të trofeve.
Më vjen mirë që në finalen e parë të këtij sezoni arritëm ta mposhtim Trepçën, e cila ka dominuar vërtet. Sezonin e kaluar na mposhtën në të dyja finalet.” Tani Bashkimin e pret një program i ngjeshur. “Luajmë në tri fronte. Na pret FIBA EuroCup, një garë shumë e fortë ndërkombëtare, por edhe të gjitha garat vendore.
Besoj se kjo fitore do të jetë një shtysë e vërtetë për një sezon të suksesshëm”, përfundoi Igor Jovoviq.