Mrekullitë ekzistojnë dhe dëshmi të tilla vijnë tashmë nga Nepali. Një grua e moshuar 97-vjeçare është nxjerrë e gjallë nga ekipet e kërkim-shpëtimit pas përmbytjeve shkatërrimtare që goditën këtë vend. Mjekët kanë zbuluar se 97-vjeçarja ndodhet në spital dhe po merr trajtimin e duhur mjekësor.
Guna Maya Bohara u shpëtua pas një operacioni që zgjati rreth katër orë, gjatë të cilit ekipet e shpëtimit punuan për ta nxjerrë nga rrënojat e shtëpisë së kujdesit për të moshuar, ku ajo ndodhej.
Stërnipi i saj, Dipak Bohara, i cili kishte udhëtuar nga Katmandu për të ndihmuar në shpëtimin e saj, tha për BBC Nepali se 97-vjeçarja dukej si “një luftëtare” që po kthehej fitimtare nga beteja. Bilanci i viktimave të konfirmuar në zonën mes Nepalit dhe Tibetit ka arritur mbi 600 të vdekur, ndërsa mbi 2400 persona rezultojnë ende të zhdukur.
Megjithëse kërkimet vijojnë 4 ditë pas katastrofës së rëndë që goditi këtë vend aziatik, shpresat për të gjetur persona të gjallë nën baltën dhe rrënojat e shkatërrimit thuajse janë shuar. Familjet e të zhdukurve, përfshirë të paktën 517 shtetas të huaj, po presin lajme për ta. Por identifikimi i trupave të gjetur është një proces mjaft i vështirë.
Shkaku i katastrofës së rëndë natyrore dyshohet se është një akullnajë e Himalajave e cila u shemb si pasojë e temperaturave të larta duke bllokuar përkohësisht rrjedhën e lumit Bhote Koshi dhe më pas duke çliruar një masë të madhe uji.
Media ndërkombëtare kanë publikuar tashmë momentin e shembjes së këtyre masave të akullit dhe shkëmbinjve shkaktoi një rrjedhë të fuqishme uji, balte dhe mbeturinash, e cila u përhap me shpejtësi në drejtim të zonave të banuara. Ekipet e emergjencës thonë se shiu dhe moti i keq po e vështirësojnë arritjen në disa nga zonat më të prekura.
Por rreziku i një vale tjetër përmbytjesh nga Himalaja mbetet alarmi më i madh që shton frikën për thellimin e përmasave të kësaj tragjedie. Një liqen akullnajor i formuar nga uji i përmbytjes dhe mbetjet pranë kufirit Nepal-Tibet mund të dalë nga brigjet e tij dhe të godasë mbi banorët e luginës kufitare.
Kapacitetet e Nepalit, për t’i bërë ballë kësaj katastrofe janë shumë më të kufizuara. Megjithëse vendi ka nevojë për gjithçka, qeveria në Katmandu ka vendosur të mos pranojë ndihmat e ofruara nga vendet e tjera. Sipas autoriteteve në Nepal, përvoja e tërmetit të vitit 2015 tregon se pranimi i ndihmës ndërkombëtare nuk është domosdoshmërisht zgjidhja më e mirë.
Referuar asaj përvoje kur ekipet e shpëtimit nuk arritën dot të mbërrinin në zonat më të largëta, autoritetet e Nepalit janë të gatshme të presin ndihma financiare, por jo ekipe shpëtimi. Banorët e zonës mbeten në emergjencë të thellë humanitare pas shkatërrimit total nga përmbytja katastrofale. Në zonat më të goditura po mbërrijnë kamionë me ndihma ushqimore dhe shëndetësore.