Presidenti amerikan Donald Trump ka nënshkruar një urdhër ekzekutiv për riemërtimin e Liqenit Ontario në “Liqeni i Amerikës”, duke nxitur reagim të menjëhershëm nga Kanadaja. Kryeministri kanadez Mark Carney ka kundërshtuar vendimin, duke deklaruar se për Kanadanë emri zyrtar do të mbetet Liqeni Ontario.
“Kanadezët e dinë se duhet t’i quajnë gjërat me emrat e tyre të ligjshëm dhe ky liqen quhet Liqeni Ontario, sot dhe përgjithmonë”, shkroi Carney në platformën X. Ai theksoi se emërtimi i liqenit ka një histori mbi 400-vjeçare dhe daton shumë përpara krijimit të Konfederatës Kanadeze dhe shpalljes së pavarësisë së Shteteve të Bashkuara.
Trump e nënshkroi urdhrin në Shtëpinë e Bardhë, ndërsa në Zyrën Ovale u shfaq edhe një hartë ku liqeni ishte emërtuar “Lake America”. Sipas urdhrit, SHBA-ja e konsideron veten “mbrojtësin më të madh të Liqeneve të Mëdha” dhe argumenton se një pjesë e konsiderueshme e vëllimit të Liqenit Ontario ndodhet në territorin amerikan.
Megjithatë, vendimi i Uashingtonit nuk nënkupton njohje ndërkombëtare të emërtimit të ri, ndërsa Kanadaja vazhdon ta njohë atë zyrtarisht si Liqeni Ontario. Trump sinjalizoi se mund të ketë edhe iniciativa të tjera për ndryshimin e emrave gjeografikë. “Kemi një gji dhe kemi një liqen. Na mungon vetëm një oqean. Pra, mund ta ndryshojmë emrin e Atlantikut ose të Paqësorit.
Mund t’i ndryshojmë të dyja”, deklaroi ai. Në fillim të mandatit të tij të dytë, Trump kishte urdhëruar edhe riemërtimin e Gjirit të Meksikës në “Gjiri i Amerikës”. Vendimi i fundit vjen në një kohë të tensioneve të shtuara mes Uashingtonit dhe Otavës, veçanërisht për shkak të mosmarrëveshjeve tregtare dhe paralajmërimeve amerikane për tarifa të reja ndaj produkteve kanadeze.
Riemërtimi i Liqenit Ontario pritet të shtojë edhe më tej tensionet mes dy vendeve, në kohën kur Kanadaja po shpresonte në rifillimin e negociatave tregtare me Shtetet e Bashkuara. Sinjali – aty ku e vërteta flet para lajmit!