Në fillimet e merkatos së verës Vllaznia zyrtarizonte afrimin e Rijad Kobiljar, mesfushorit që sezonin e fundit ishte pjesë e Tiranës. Tani, pa u mbyllur merkatoja e verës, klubi shkodran njofton transferimin e këtij futbollisti në Bahrejn. “KF Vllaznia njofton transferimin e futbollistit Rijad Kobilar te klubi i Bahrejnit, Muharraq SC.
I urojmë Rijadit shumë suksese në vazhdim të karrierës!” – shkruan klubi kuqeblu në faqen zyrtare sa i takon kësaj lëvizjeje. Kobiljar luajti vetëm një ndeshje zyrtare me Vllazninë, atë të javës së pare të kampionatit. Aventura e tij në Shkodër zgjati pak, ndërkohë që nuk bëhet e ditur, nëse klubi verior ka fituar financiarisht nga ky transferim apo jo.
Vllaznia e nisi kampionatin e ri me një barazim ndaj Skënderbeut në “Loro Boriçi”, ku u duk se nuk kishte petkun e skuadrës së sezonit të kaluar për të pretenduar titullin kampion.