Presidenti rus Vladimir Putin i ka dhënë shtetit kompetenca të reja për të marrë përkohësisht kontrollin e kompanive që menaxhojnë objekte strategjike, nëse ato konsiderohen të paafta për t’i mbrojtur nga sulmet me dronë ukrainas.
Sipas një dekreti presidencial, autoritetet ruse mund të marrin kontrollin e përkohshëm të aseteve materiale e financiare, si edhe të të drejtave të pronësisë, në rast se kompanitë përgjegjëse nuk kanë garantuar mbrojtjen e objekteve ose kanë vonuar riparimin e dëmeve pas sulmeve.
Masa vlen për një gamë të gjerë sektorësh, përfshirë industrinë, karburantet dhe energjinë, telekomunikacionin, shërbimet publike, transportin, zinxhirët e furnizimit, si dhe objekte të konsideruara kritike ose potencialisht të rrezikshme.
Vendimi vjen në një kohë kur Ukraina ka shtuar sulmet me dronë ndaj infrastrukturës ruse, veçanërisht ndaj rafinerive të naftës, depove dhe qendrave të shpërndarjes. Javën e kaluar, Putin urdhëroi qeverinë ruse të nisë një program për rindërtimin e depove tregtare të dëmtuara ose shkatërruara nga sulmet ukrainase.
Sipas raportimeve, që nga 18 korriku janë goditur të paktën dy duzina depo të kompanisë së madhe ruse të tregtisë online Wildberries, ndërsa kompania Ozon njoftoi se katër qendra të saj të shpërndarjes në jug të Rusisë u vunë në shënjestër të sulmeve.
Dekreti i ri i jep Moskës një instrument të drejtpërdrejtë për të ndërhyrë në menaxhimin e kompanive strategjike, nëse ato vlerësohen se nuk kanë marrë masat e nevojshme për mbrojtjen e infrastrukturës së tyre.