Të paktën dy persona janë vrarë në Ukrainë nga sulmet ruse, ndërsa nëntë persona vazhdojnë të konsiderohen të zhdukur, një ditë pas sulmit të dyfishtë me dron ndaj një qendre tregtare, ku humbën jetën 16 persona.
Autoritetet lokale thanë se një person humbi jetën në një zjarr në një magazinë në Kiev, pas alarmit për një raketë balistike, ndërsa një tjetër u vra në një sulm me dron në Zaporizhzhia në orët e para të së shtunës. Ministria ruse e Mbrojtjes tha se kishte kryer sulme masive, duke shënjestruar infrastrukturën e transportit dhe magazinat.
Sulmet vijnë pas një sulmi vdekjeprurës rus me dronë, të kryer në dy valë, ndaj një qendre tregtare të frekuentuar në Kryvyi Rih të premten. Presidenti ukrainas Volodymyr Zelensky e cilësoi sulmin si “absolutisht cinik dhe të neveritshëm”. Zelensky tha se sulmi gjatë ditës në qytetin e tij të lindjes u krye në “dy valë”, ndërsa sulmi i dytë kishte në shënjestër ekipet e emergjencës.
Pamjet dramatike, të verifikuara nga BBC -ja, tregojnë dronin e dytë duke goditur qendrën tregtare, e cila tashmë ishte përfshirë nga flakët, në rajonin e Dnipropetrovskut. Ushtria ruse nuk ka komentuar për sulmin. Në sulmin ndaj qendrës tregtare më të madhe të qytetit u plagosën 130 persona, përfshirë 23 fëmijë. Raportohet se persona të tjerë mund të jenë ende të bllokuar nën rrënoja.
Në orët e para të së shtunës, kreu i rajonit të Dnipropetrovskut, Oleksandr Hanzha, tha se numri i viktimave kishte arritur në 16, pasi nga rrënojat u nxor edhe një trup tjetër. Sipas Hanzhës, nëntë persona, përfshirë dy fëmijë, vazhdojnë të jenë të zhdukur në qendrën tregtare. Më herët të premten, Hanzha kishte thënë se nga 130 të plagosurit, 29 ishin në gjendje të rëndë.
Ekziston frika se numri i viktimave mund të rritet më tej. Ekipet e shpëtimit nga katër rajone të tjera të Ukrainës po dërgohen urgjentisht për të ndihmuar në kërkimin e të mbijetuarve. Kryetari i Kryvyi Rihut, Oleksandr Vilkul, tha se dronët rusë po fluturonin në “lartësi jashtëzakonisht të ulëta”, duke i cilësuar sulmuesit si “kafshë”.
“Ka persona të zhdukur që nuk po përgjigjen në telefonata”, shtoi kryetari. Në Kiev, administrata ushtarake e qytetit tha se një zjarr kishte shpërthyer në një magazinë në lagjen Darnytskyi në orët e para të së shtunës. “Sipas informacioneve paraprake, fatkeqësisht, një person ka humbur jetën dhe disa të tjerë janë plagosur”, tha administrata në Telegram.
Në qytetin jugor të Zaporizhzhias, një sulm rus me dron vrau të paktën një burrë dhe plagosi katër persona, sipas Ivan Fedorovit, kreut të administratës ushtarake rajonale. Katër persona, përfshirë tre fëmijë, u vranë në sulme të ndara ruse në rajonin jugor të Mykolaivit të premten, ndërsa dy të tjerë humbën jetën në rajonin verilindor të Harkivit, thanë zyrtarët lokalë.
Ndërkohë, të enjten, 17 persona u vranë dhe më shumë se 40 të tjerë u plagosën në një sulm të madh rus me raketa dhe dronë ndaj Kievit. Më herët të premten, ushtria ukrainase tha se kishte kryer sulme ndaj një rafinerie nafte dhe një aeroporti ushtarak në thellësi të territorit rus.
Ukraina ka intensifikuar muajt e fundit sulmet ndaj objekteve energjetike ruse, si dhe ndaj magazinave të kompanisë më të madhe ruse të shitjeve online, Wildberries. Kievi i cilëson këto si objektiva legjitime, pasi sipas tij ato ndihmojnë në financimin e luftës së Rusisë. Presidenti rus Vladimir Putin nisi pushtimin në shkallë të plotë të Ukrainës në shkurt të vitit 2022.
Aktualisht, Moska kontrollon rreth një të pestën e territorit ukrainas në juglindje. Sinjali – aty ku e vërteta flet para lajmit!