Komisioni Evropian po shqyrton ndryshimin e rregullave që kufizojnë përdorimin e dronëve për spërkatjen e pesticideve, duke synuar zgjerimin e përdorimit të kësaj teknologjie në bujqësinë evropiane.
Nisma është pjesë e një rishikimi më të gjerë të rregullave të Bashkimit Evropian për produktet e mbrojtjes së bimëve, ndërsa disa vende anëtare kanë kërkuar më shumë fleksibilitet për përdorimin e dronëve në sektorin bujqësor.
Dronët tashmë përdoren në shumë vende për monitorimin e të korrave, zbulimin e dëmtuesve dhe sëmundjeve, si dhe për aplikimin më të saktë të plehrave dhe produkteve për mbrojtjen e bimëve. Mbështetësit e kësaj teknologjie vlerësojnë se dronët mund të ndihmojnë në reduktimin e përdorimit të pesticideve, pasi substancat mund të aplikohen vetëm në zonat ku nevojitet ndërhyrje.
Kjo, sipas tyre, mund të ulë si kostot për fermerët, ashtu edhe ndikimin në mjedis. Komisioneri Evropian për Bujqësinë, Christoph Hansen, ka deklaruar se Evropa ka teknologjinë dhe potencialin për të avancuar në bujqësinë dixhitale dhe se fermerët duhet të përfitojnë nga këto zhvillime.
Rregullat aktuale të BE-së kufizojnë spërkatjen ajrore me pesticide për shkak të shqetësimeve për përhapjen e pakontrolluar të kimikateve, ndotjen e mjedisit dhe ekspozimin e njerëzve. Megjithatë, këto rregulla janë hartuar përpara zhvillimit të dronëve modernë bujqësorë.
Në raste të veçanta, autoritetet kombëtare tashmë mund të lejojnë spërkatjen ajrore, veçanërisht në zona ku përdorimi i traktorëve është i vështirë ose i rrezikshëm, si në vreshta të pjerrëta apo zona të përmbytura.
Komisioni Evropian pranon se ende ekzistojnë pikëpyetje për sigurinë, përfshirë distancën në të cilën era mund t’i bartë pesticidet dhe mënyrën se si mund të kontrollohet saktësisht aplikimi i tyre. Për këtë arsye, çdo ndryshim i rregullave pritet të shoqërohet me kritere dhe vlerësime të posaçme të sigurisë.
BE-ja synon që dronët të bëhen pjesë e një strategjie më të gjerë për bujqësinë dixhitale, krahas inteligjencës artificiale, satelitëve dhe teknologjive të bujqësisë precize. Megjithatë, organizatat mjedisore kanë kërkuar më shumë prova shkencore përpara zgjerimit të përdorimit të dronëve për pesticide, duke ngritur shqetësime edhe për privatësinë dhe kostot e teknologjisë.
Sipas propozimit që po shqyrtohet, shtetet anëtare mund të kenë më shumë hapësirë për të autorizuar përdorimin e dronëve, nëse vlerësohet se ata nuk paraqesin rrezik më të madh se metodat tradicionale të spërkatjes. Sinjali – aty ku e vërteta flet para lajmit!