” Republika Çeke mbështet anëtarësimin e Maqedonisë së Veriut në Bashkimin Evropian dhe është e gatshme të bëjë gjithçka që është e nevojshme që vendi të bëhet anëtar i Unionit sa më shpejt të jetë e mundur “, tha sot Zëvendëskryeministri dhe Ministri i Punëve të Jashtme i Republikës Çeke, Petr Macinka, pas një takimi me Ministrin e Punëve të Jashtme dhe Tregtisë së Jashtme të RMV-së, Timço Mucunski.
Në takimin në Ohër, Macinka theksoi se anëtarësimi i Maqedonisë së Veriut në BE është një përparësi për Republikën Çeke dhe se vendi është i gatshëm të ndajë përvojën e vet nga procesi i anëtarësimit. “Anëtarësimi i Maqedonisë së Veriut në Bashkimin Evropian është një përparësi për Republikën Çeke.
Është në interesin tonë të përbashkët që Bashkimi Evropian të zgjerohet me vendet që po kalojnë nëpër negociata anëtarësimi, pikërisht në mënyrën që po bën vendi juaj. Procesi ynë i anëtarësimit nuk ishte i lehtë, zgjati shumë. Gjatë atij procesi, ne nuk bëmë gjithçka siç duhet, kështu që kemi shumë përvojë që mund ta ndajmë, në mënyrë që të mos përsërisni gabimet që bëmë ne.
Por gjatë gjithë kësaj kohe ne donim ta ndryshonim vendin tonë në mënyrë që të ishte anëtar i Bashkimit Evropian. Na duhej të kishim dikë nga brenda që mund të fliste të njëjtën gjuhë, që kishte të njëjtën pikëpamje për botën si ne, që i kuptonte punët e Bashkimit Evropian.
Tani jemi në një situatë ku jemi anëtarë të Bashkimit Evropian, por unë e siguroj ministrin Mucunski dhe të gjithë përfaqësuesit e tjerë të Maqedonisë së Veriut se ne jemi vërtet një vend mik”, theksoi Macinka. Ministri i Jashtëm çek tha se Maqedonia e Veriut mund të mbështetet te Republika Çeke si një vend mik dhe se Praga po e ndjek kompleksitetin e procesit të pranimit të vendit.
Ndërkohë, Ministri i Punëve të Jashtme dhe Tregtisë së Jashtme Timço Mucunski theksoi se vizita po zhvillohet në një vit në të cilin vendi feston 35 vjet pavarësi, ndërsa marrëdhëniet diplomatike me Republikën Çeke po hyjnë në dekadën e tyre të katërt.