Jamal Musiala, ylli i Bayern Munihut, u rrëzua përsëri në fushë gjatë një ndeshjeje miqësore kundër Heidenheim-it. Pasi u rrëzua dhe humbi ndjenjat për herë të dytë brenda katër ditësh, Musiala reagoi në rrjetet sociale dhe tha se, mbi të gjitha, është mirë. Ai u përpoq t’u shpjegonte tifozëve se çfarë po ndodh.
Musiala theksoi se është në dijeni të diagnozës së tij dhe se vendimi i tij është ta përballojë këtë situatë duke vazhduar të jetë në fushë. “Para së gjithash, jam mirë. Jam jashtëzakonisht mirënjohës për të gjitha mesazhet dhe mbështetjen tuaj. E kuptoj që shumë prej jush janë të shqetësuar.
Dua t’ju them se nuk ka arsye për t’u shqetësuar dhe t’ju shpjegoj: më janë diagnostikuar episode të përkohshme të të fikëtit, të cilat trajtohen lehtë dhe janë pasojë e një mosfunksionimi neurologjik. Kjo mund të shkaktojë momente si ato që kanë ndodhur gjatë periudhës së fundit, për shembull kundër Leipzigut ose Heidenheim-it.
E di që në pamje të parë duket e frikshme, por për mua, në këtë moment, kjo është thjesht pjesë e përditshmërisë. Kam kujdesin më të mirë të mundshëm mjekësor dhe jam shumë optimist. Bayerni dhe njerëzit më të afërt me mua janë gjithmonë pranë meje dhe më mbështesin në rrugëtimin tim. Ajo që është e rëndësishme është se nuk ka asnjë rrezik shtesë për shëndetin tim.
Jam në komunikim të përditshëm me specialistët. Ishte dëshira ime personale që ta përballoja këtë situatë, gjithçka me miratimin e neurologëve specialistë, në mënyrë që të merrja kujdesin më të mirë të mundshëm gjatë rikuperimit. Gjëja më e rëndësishme është që thjesht të vazhdoj normalisht me jetën e përditshme dhe të vazhdoj të luftoj për ëndrrën time në futboll.
Unë marr përgjegjësi për vendimet e mia. Gjithçka.”.