Ndeshja e fundit e Real Madridit para debutimit në La Liga kundër Espanyolit i dha José Mourinhos sinjale shumë pozitive. “Los Blancos” i mbyllën përgatitjet verore me një fitore të pastër 3-0 ndaj Schalke 04, në një ndeshje që i shënoi edhe minutat e para me fanellën e Realit për afrimet e reja Marc Cucurella, Ibrahima Konaté dhe Yan Diomande.
Megjithatë, vëmendjen më të madhe e mori rikthimi në fushë i Kylian Mbappé, në paraqitjen e tij të parë të sezonit. Francezit iu deshën shumë pak minuta për të lënë gjurmë, duke e zhbllokuar rezultatin në minutat e parë pas një gabimi të mbrojtjes gjermane.
Mbappé u shfaq menjëherë në formë të shkëlqyer: pati shpërthime pas vijës së mbrojtjes së Schalkes, i rrezikshëm në metrat e fundit dhe shumë i përfshirë edhe në fazën pa top, me disa rikuperime dhe një qëndrim të vlerësuar nga stafi teknik. Mourinho më pas e zëvendësoi në pushimin e pjesës së parë, me shumë gjasa për të menaxhuar ngarkesën fizike.
Paraqitja e tij mjaftoi për ta rikthyer entuziazmin në Spanjë, por edhe për ta përsëritur një kërkesë të qartë: këtë vit duhen trofe. “AS” e hapi gazetën me titullin “Lideri është ende Mbappé”, duke theksuar se francezi është lideri teknik i projektit të ri madrilen.
Edhe “Marca” e vlerësoi paraqitjen e tij: “Nëse Kylian dëshiron të bëhet një legjendë e Real Madridit, një pjesë e madhe e këtij suksesi do të varet nga ajo që do të arrijë ta bëjë deri në qershor. Ai i ka të gjitha në favorin e tij: klubi e ka rrethuar me shokët më të mirë të mundshëm dhe mbi të gjitha me trajnerin më të mirë, Mourinhon. E treta duhet të jetë ajo e duhura”.
Në të njëjtën linjë është edhe “Cadena SER”: “Sezoni i tretë do të jetë ai i duhuri. Në aspektin statistikor, Mbappé është unik, por i mungojnë trofetë. Ky vit mund të jetë ai i duhuri”. Pas dy sezoneve me shifra të mëdha, por pa suksese, Mbappé hyn kështu në vitin vendimtar. Talenti i tij nuk është vënë kurrë në diskutim: tani Real Madridi i kërkon që ta shndërrojë atë në fitore.