Ushtruesja e detyrës së Presidentes së Kosovës, Albulena Haxhiu, ka deklaruar se zgjedhjet e shkurtit 2025 kanë qenë zgjedhjet e fundit të rregullta pas një mandati të plotë qeverisës, ndërsa dy proceset zgjedhore që pasuan i ka cilësuar të panevojshme dhe të dëmshme për qytetarët dhe buxhetin e Republikës.
“Zgjedhjet e shkurtit 2025 kanë qenë zgjedhjet e fundit të rregullta pas një mandati të plotë qeverisës. Pas këtyre ishin ato të 28 dhjetorit të po atij viti, e më pas edhe ato të 7 qershorit të këtij viti. Të dy këto palë zgjedhje ishin të panevojshme dhe të dëmshme, si për qytetarët ashtu edhe për buxhetin e Republikës”, ka shkruar Haxhiu.
Sipas saj, rezultatet e përafërta të tri proceseve zgjedhore tregojnë se pa dialog politik, veçanërisht për çështjen e Presidentit, nuk mund të gjendet një rrugëdalje. Haxhiu ka theksuar se pikërisht çështja e Presidentit duhet të jetë pika e parë nga ku duhet të nisë dialogu politik, pasi sipas saj, mungesa e një marrëveshjeje rrezikon ta dërgojë vendin sërish në zgjedhje.
Ajo ka bërë të ditur se ka ftuar krerët e të gjitha subjekteve politike parlamentare për të diskutuar për një konsensus politik. Haxhiu ka shprehur keqardhje që PDK-ja dhe AAK-ja kanë refuzuar ftesën, duke e cilësuar këtë si veprim të gabuar dhe mungesë vullneti për tejkalimin e bllokadës politike.
Në fund, ajo ka thënë se qytetarët e kanë dhënë mesazhin e tyre përmes zgjedhjeve dhe se detyrë e përfaqësuesve politikë është që këtë mesazh ta zbatojnë në praktikë. “Kosova ka nevojë për shumë punë. Zgjedhjet do të duhej të ishin opsioni i fundit, nëse jo fare opsion”, ka shkruar Haxhiu.
Ajo ka shprehur shpresën që deri të martën të ketë reflektim nga subjektet politike dhe që takimi të shërbejë për gjetjen e një zgjidhjeje. Sinjali – aty ku e vërteta flet para lajmit!