Gabriel Martinelli ka refuzuar mundësinë e transferimit te Galatasaray, një vendim që mund të ndikojë ndjeshëm në merkaton e Milanit dhe Romës. Klubi turk kishte paraqitur një ofertë prej rreth 45 milionë eurosh për anësorin brazilian të Arsenalit. Megjithatë, Martinelli nuk e konsideron Galatasarayn si destinacion të mundshëm për të ardhmen e tij.
Ky qëndrim mund të hapë një tjetër skenar për Romën, e cila po kërkon përforcime në repartin ofensiv. Klubi kryeqytetas italian është aktualisht në negociata për talentin e Portos, Rodrigo Mora. Megjithatë, marrëveshja për portugezin rrezikon të dështojë për shkak të mosmarrëveshjeve mbi kushtet e transferimit.
Operacioni për Morën vlerësohet rreth 50 milionë euro, por palët nuk kanë gjetur ende gjuhën e përbashkët. Nëse negociatat ndërpriten, Roma mund ta rikthejë vëmendjen te Martinelli. Situata komplikohet edhe më shumë nga interesimi i Galatasarayt për vetë Rodrigo Morën. Mediat portugeze raportojnë se klubi turk është rikthyer në garë për talentin e Portos.
Në këtë mënyrë, mund të krijohet një skenar interesant në merkato mes tre klubeve. Galatasaray mund të fokusohet te Mora, ndërsa Roma të tentojë transferimin e Martinellit. Vendimi i brazilianit mund të jetë pozitiv edhe për Milanin dhe planet e tij në merkato. Kuqezinjtë shpresojnë që Galatasaray të rikthehet në garë për Rafael Leaon para mbylljes së merkatos.
Një transferim i Martinellit në Turqi do ta kishte komplikuar këtë skenar, ndërsa refuzimi i tij i lë Milanit më shumë hapësirë për të negociuar.