Legjenda e Liverpoolit, Jamie Carragher, ka shprehur shqetësimin e tij për repartin e mesfushës së skuadrës, duke vlerësuar se opsionet aktuale mund të mos jenë të mjaftueshme për të luftuar për titullin e Premier League në sezonin e ri. Liverpooli, nën drejtimin e trajnerit të ri Andoni Iraola, nuk ka bindur gjatë fazës përgatitore.
“Të kuqtë” kanë pësuar dy humbje në katër ndeshje miqësore, duke ngritur pikëpyetje para nisjes së kampionatit. Skuadra angleze do të zhvillojë dy ndeshje ndaj Comos të Cesc Fabregasit të dielën, vetëm një javë para sfidës së parë në Premier League kundër Newcastle United.
Në një kohë kur Liverpooli po kërkon të përforcojë krahët e sulmit me një prej objektivave Bradley Barcola ose Ibrahim Mbaye, Carragher ka fokusuar vëmendjen te mesfusha dhe ka paralajmëruar se ajo mund të jetë pika e dobët e skuadrës. “E shikoj atë treshe të mesfushës dhe shqetësohem.
Kur përmend gjashtë apo shtatë lojtarë të Liverpoolit, nuk mund të thuash se nuk janë futbollistë të nivelit të lartë”, ka deklaruar Carragher. Ai ka veçuar cilësitë individuale të Ryan Gravenberch, Florian Wirtz dhe Dominik Szoboszlait, por ka ngritur dyshime nëse kombinimi i tyre në një treshe funksionon në mënyrën e duhur.
“Nuk mund të thuash se Gravenberch nuk është një lojtar shumë i mirë, apo Wirtz dhe Szoboszlai. Por kur i shoh si një treshe, mendoj se ka pothuajse shumë cilësi individuale, ndërsa të gjithë duan të dalin përpara dhe të vrapojnë. Edhe gjatë fazës përgatitore, hapësirat po krijohen në qendër”, ka shtuar ish-mbrojtësi. Carragher ka qenë i qartë në vlerësimin e tij për repartin e mesfushës.
“E kam të vështirë të shoh se si kjo treshe, pavarësisht se të tre janë individualisht lojtarë shumë të mirë, mund ta rikthejë Liverpoolin në garën për titull. Për këtë nuk jam aspak i bindur”, ka përfunduar ai. Aktualisht, mesfusha e Liverpoolit përbëhet kryesisht nga Alexis Mac Allister, Dominik Szoboszlai dhe Ryan Gravenberch.
Ndërkohë, Wataru Endo, Harvey Elliott dhe Curtis Jones janë lidhur me largimin nga klubi, ndërsa talenti Trey Nyoni ende nuk konsiderohet plotësisht i gatshëm për të marrë një rol të rëndësishëm. Në Liverpool shpresojnë që Florian Wirtz të tregojë më shumë në sezonin e ri, pas një fillimi jo të qëndrueshëm në aventurën e tij në “Anfield”.
Megjithatë, kritikat e Carragher mund ta shtyjnë klubin të shqyrtojë edhe një përforcim të ri në mesfushë para mbylljes së afatit kalimtar.