Arsenali mund të shqyrtojë shitjen e Martin Zubimendit gjatë këtij afati kalimtar, nëse në adresë të klubit londinez mbërrin një ofertë që i plotëson kërkesat financiare. Sipas raportimeve të mediave angleze, ardhja e Bruno Guimaraes për rreth 86 milionë euro mund të ndikojë në rolin e Zubimendit në skuadrën e Mikel Artetës dhe të reduktojë minutat e tij në sezonin e ri.
Megjithatë, kjo nuk do të thotë se mesfushori spanjoll është zyrtarisht në shitje. Zubimendi ka kontratë me Arsenalin deri në vitin 2030 dhe klubi anglez ende dëshiron ta mbajë në skuadër. Transferimi i Guimaraes nga Newcastle i ka dhënë Artetës më shumë alternativa në mesfushë, pasi braziliani mund të luajë si “numër gjashtë”, por edhe në pozicione më të avancuara.
Zubimendi kishte një rol të rëndësishëm te Arsenali sezonin e kaluar. 27-vjeçari zhvilloi 38 ndeshje në Premierligë, shënoi pesë gola dhe regjistroi një asistim, ndërsa në të gjitha garat grumbulloi më shumë se 4 mijë minuta.
Megjithatë, ardhja e Guimaraes mund të ndryshojë hierarkinë në mesfushë dhe Arsenali nuk dëshiron që një lojtar me kontratë afatgjatë të mbetet me minuta të kufizuara, duke rrezikuar edhe uljen e vlerës së tij në treg. Sipas raportimeve, Arsenali do të ishte i gatshëm të dëgjonte ofertat për Zubimendin nëse ato arrijnë në rreth 90 milionë euro.
Një situatë e tillë mund të aktivizojë Real Madridin, i cili prej kohësh e ka ndjekur profilin e mesfushorit spanjoll. Nëse Arsenali vendos ta nxjerrë në shitje, madrilenët mund të shfaqen si një prej destinacioneve më serioze për Zubimendin.
Zubimendi iu bashkua Arsenalit nga Real Sociedadi në verën e vitit 2025 për rreth 60 milionë euro, ndërsa kontrata e tij aktuale me “Topçinjtë” skadon në vitin 2030. Sinjali – aty ku e vërteta flet para lajmit!