Barcelona ka marrë një vendim që mund t’i kushtojë në të ardhmen, duke lejuar largimin e kapitenit Ronald Araujo, i cili është transferuar te Liverpooli në formë huazimi. Marrëveshja mes dy klubeve ka befasuar jo pak, sidomos duke pasur parasysh statusin e mbrojtësit uruguaian në “Camp Nou”.
Megjithatë, forma e tij gjatë sezonit të fundit dhe problemet që ka kaluar kanë bërë që Barcelona të jetë e hapur për këtë lëvizje. 27-vjeçari, nuk e kaloi sezonin 2025/26 në mënyrën më të mirë të mundshme.
Ai u detyrua të qëndronte jashtë fushave për një periudhë për shkak të problemeve të shëndetit mendor, ndërsa Barcelona i dha kohën e nevojshme për t’u rikuperuar dhe për t’u rikthyer në gjendjen e duhur. Kur u rikthye, skuadra e Hansi Flick tashmë po funksiononte mirë edhe pa të.
Për këtë arsye, Araujo pati vetëm 11 paraqitje si titullar në LaLiga dhe 16 në të gjitha garat gjatë sezonit të kaluar. Pavarësisht vështirësive, uruguaiani vazhdon të ketë shumë cilësi që e bëjnë një mbrojtës të vlefshëm. Ai është i fuqishëm fizikisht, shumë i shpejtë dhe mund të luajë si në qendër të mbrojtjes, ashtu edhe në krahun e djathtë.
Në sezonin e kaluar, Araujo zhvilloi 1,614 minuta në të gjitha garat, ndërsa përqindja e pasimeve të sakta nuk i ra asnjëherë nën 88.02%. Edhe në duelet ajrore ai tregoi forcën e tij. Nga 97 duele të zhvilluara në ajër, Araujo fitoi 69 prej tyre. Ndërkohë, në duelet një kundër një në tokë fitoi 108 nga 164 përballje, ndërsa në ndërhyrjet e tij regjistroi 24 fitore nga 33 tentativa.
Mbrojtësi uruguaian kontribuoi edhe në fazën ofensive, duke shënuar tre gola me kokë nga katër realizimet e tij gjatë sezonit të kaluar. Megjithatë, një nga problemet kryesore të Araujos kanë qenë ndërhyrjet e nxituara, të cilat në disa raste i kanë kushtuar me kartonë të kuq dhe pezullime.
Po ashtu, paraqitjet e tij në ndeshjet më të rëndësishme të Barcelonës kanë ngritur pikëpyetje për vendimmarrjen e tij. Në Liverpool, situata mund të jetë ndryshe. Të luajë përkrah një lideri si Virgil van Dijk mund t’i heqë një pjesë të presionit që kishte në Barcelonë, sidomos tani që nuk do të ketë përgjegjësinë e kapitenit.
Për Liverpoolin, huazimi i Araujos nuk paraqet një rrezik të madh. Klubi anglez do të ketë mundësinë ta vlerësojë nga afër mbrojtësin uruguaian dhe, nëse ai arrin të rikthehet në nivelin e tij më të mirë, “Reds” mund të tentojnë ta transferojnë përfundimisht. Nëse Araujo e shfrytëzon këtë mundësi, Barcelona mund të jetë ajo që do të pendohet për vendimin e marrë për kapitenin e saj.